E fundación “Ban duna un man pa nos muchanan” a bin ta trahando pa hopi aña caba pa comunidad di Aruba, specialmente pa esnan vulnerabel cu ta e muchanan. Nan ta percura cu e muchanan di famia di poco recurso por tin un bon desayuno. E presidente John Fun a splica cu den e temporada prome cu e pandemia e situacion a stabilisa.
A stabilisa den e sentido cu e cantidad di muchanan cu tabatin mester di e ayudo aki no a bay mas cu 650. “E tabata bayendo bon. Nos tabata haya ayudo di sponser y clubnan di servicio. E fondonan door di esey tabata basta stabiel.”
Durante aña di COVID e situacion a cambia hopi, unda cu scolnan a cera y pa cual no tabata sirbi pan na scolnan. Berdad a spaar placa, pero hopi di esnan cu tabata sponser, haci donación, a perde nan trabou y consecuentemente no por a yuda mas. Pero tambe hopi hende a perde nan trabou pa cual pobreza a subi y tambe e cantidad di muchanan cu mester haya un desayuno.
Si na februari, 2020, tabatin 650 mucha inscribi, awo ta yegando casi 800 mucha. Banda di esaki, gastonan a subi y ta nota esaki na momentonan di compra material cu e suma cu ta paga ta hopi mas cu antes. P’esey e ta bisa cu aña 2021 ta bay ta uno duro pa loke ta entradanan.
E situacion reinante ta exigi cu lo mester sinta y analisa kico ta bay haci cu e fundación bou di e circunstancianan aki.
Na inicio di aña escolar ta manda un email na tur e scolnan cu ta inscribi na e fundación y ta puntra pa analisa cual ta e muchanan cu mester di desayuno. Probablemente e lo aumenta y esaki lo no ta un sorpresa pa nan mirando e situacion.
E fundación ya tin 20 aña di existencia y nan meta tabata muchanan di scol básico, pero a haya carta y peticion di diferente otro scol. Awo e ta cuminsa for di kleuterschool te na e scolnan secundario.
Pa hopi di e muchanan, Fun a splica, e desayuno cu nan ta haya di e fundación ta nan cuminda principal di dia. Esey ta crea hopi preocupación cerca nan pa situacion di e muchanan durante vakantie y mas ainda durante e pandemia ora cu 7 luna largo scolnan tabata cera. No tin e logística pa analisa e situacion di e muchanan na cas. Aworaki e datonan cu tin ta cu ta percura pa desayuno na 55 scol c uta percura pa parti e pannan. Pa yega te na cas ta difícil.
E fundación ta haci un apelacion na comunidad pa contribui cu un suma mensual chikito y esaki lo ta un gran ayudo. Pa mas información por yama hospital puntra pa Rachelle Roos, kende ta mantene contacto cu tur e instancianan. Of por yama John Fun na 6992330.