Ban coopera cu nos colega den prensa, Sulaika Francees.
Diasabra mainta Aruba a keda conmovi cu fayecimento di un hoben cu apenas un siman prome a cumpli 23 aña. Sigur un sla masha duro pa henter famia y sigur pa su mama, wela y rumannan.
Famia ta pasando den momentonan hopi dificil pero si ta gradici tur muestra di apoyo y convivencia ricibi di parti nos comunidad y tambe for di exterior. Tur cos ta cla pa asina hiba Edmard Lampe na su ultimo luga di sosiego. Pero nos a ricibi un mensahe di su kerida Mama cu kier a haci un peticion special na tur esunnan cu ta desea di pasa despedi di Edmard.
Pa condolencia , esaki lo ta diamars 18 di Juni di 7 pa 9 pm na Ad Patres Funeral Home na San Nicolaas. Acto di entiero lo ta diaranson 19 di Juni , saliendo pa 1or for di Ad Patres Funeral Home, pa Misa Imaculada Concepcion na Santa Cruz.
Mensahe di Sulaika:
“Ami kier a invita un y tur cu ta sinti aprecio y un cariño special pa Edmard, pa bin despedi di dje den gran forma pero manteniendo respet pa nos como famia mientras e ta den misa te ora e yega na su ultimo luga di sosiego . Mi sa cu Edmard lo kier tur su amigo y conocinan , famia y ex coleganan rindi honor na su recuerdo pero tambe 100% manteniendo e trankilidad y respet pa mi, su rumannan,, su dudu cu tanto e la stima. Tur cos lo wordo filma y p’esey mi kier a pidi tur hende pa cumpli cu mi deseo pa mi hiba mi Vaatje cu boso compania na su ultimo luga di descanso. Despues di pone Edmard hunto cu su wela defunto den su paraiso boso lo tin e oportunidad pa dun’e su homenahe.
Na nomber di mi Mama Rosa, mi yuinan Jonathan y Su Jay y demas famia y conocir mi ta aprecia tur cooperacion”.
Yudansa :
Como cu e hecho horibel y lamentabel aki a tuma nos tur di sorpresa, nos como famia y amigonan ta pidi boso yudansa pa por cubri parti di e gastonan di entiero di nos Edmard stima. Por haci esaki cu bo donacion na Ad Patres durante e ora di condolencia y tambe na Misa durante entiero, lo tin un box disponibel pa haci esaki y tambe por haci bo contribucion na e cuenta di MCB # 400.882.305 na nomber di Sulaika Francees, nos ta aprecia tur yudansa pa duna nos defunto stima un entiero mereci.