For di nos amigonan di Fundacion Chico Harms, nos a ricibi informacion cu nan miembro fundado Chico Harms a cumpli su di 77 primavera.
E felicitacion aki a wordo compaña pa un bunita dedicatorio di parti di e fundacion mes na su progenitor, kende a dedica gran parti di su bida na cultura di nos isla, en particular e bario di Brazil.
Nos por topa Chico na practicamente tur actividad cu e Fundacion organisa, manera e Parada di Cultura na Brazil, e Festival Cantica di Caya, como tambe e Show di Dande, cu a tuma luga dia 27 di december ultimo.
Sigur un persona cu merece nos respet p’e dedicacion n’e desaroyo cultural di e bario.
E dedicatorio ta bisa lo siguiente:
Cu felicidad y gratitud lo compaña bo tur caminda na unda cu bo bay y cu bo nunca sinti cu bo ta bo so. Cu tur luga, espacio y tempo na unda cu bo bula, cana, drumi, soña, haci, explora, stima, nabega y habita, lo sea semper bendiciona. Cu bendicion di Dios lo ta constante riba cada dia cu bo wowonan por mira cu yen di asombro, dicha y prosperidad.
Cu e rayonan di solo por ilumina bo pa den cualkier momento di scuridad bo por tin reserva pa por manda bo luz na tur esunnan cu mester di bo claridad. Cu claridad di luna y e refleho di tur strea compaña bo mente briyante den e ritmo di nos naturalesa sin mester di haci daño ni maldad. Cu cada seconde lo por ta mas activo, cu cada minuut lo ta mas positivo, cu cada ora lo ta un mundo mas creativo.
Cu tur sinceridad bo por forma parti di tur paisahe sin mester di camufla. Cu bo mannan lo por crea obranan di berdad, cu bo pianan lo cana riba ruta di felicidad, cu bo oreanan por tin espacio pa scucha e notanan celestial, cu bo curason lo bati na ritmo di libertad, cu bo boca lo papia palabranan di union, bida, paz, honestidad, amistad y di bondad.”
Sigur un dedicacion na su luga. Di parti di nos na Masnoticia.com tambe nos ta felicita Chico Harms cu su di 77 cumpleaños.
