Naci humildemente riba e punto di sero pazuid na Angochi, patras den e mondinan di Santa Cruz. El a nace den e epoca di busca awa cu burico y
su halifat. A crece na e cas cu e prome auto, e prome generator den bario y e prome telefon na pal’i telefon. Den un famia di cunukero a
nace: Juan Chikito. Yiu di Juan Grandi, e famoso mansado di burico cu a mansa burico pa tur su bisiñanan den e epoca prome cu auto.
Acompaña pa su estimada esposa Pilar, of Machi Nina. Na Caracas conoci como: “Juan de Nederland”. Tambe cariñosamente conoci como “Mo Juan”, “Pachi”,“Pachi Juan” of “Skip”, den bisindario. “Skip” ta un nomber specificamente uza entre su coleganan futbolista, cual tawata forma pa
un gran parti door di su rumannan y su subrinonan.
Den futbol nan tawata tin codigonan como nomber, pa asina e contrincantenan no por a alinea ta unda e bala tawata bayendo, ni sa
ken pa sigui. E trofeo di mas grandi cu bo por a gana den famia Werleman ta un nomber di cariño, ta cosnan cu placa no por cumpra. Den
su mundo profesional, su amigo y mentor mas stima tawata Wim van Helvoort. Gobiernonan por a bay y bin. Politiconan tin manera di
disparce si nan no haya e stoel tan desea. Pero nan dos, dia y anochi pa decadanan, tur mashin tawata di nan y asina semper buscando un
obstaculo nobo, pa embeyece of complementa e infrastructura di e Isla cu tanto nan a stima.
Memey di tur e trabounan di mas bruto, asta e hardin di mas bunita di tur e hotelnan nan a gana cu Playa Linda e tempo ey, asina semper
contemplando e horizonte. Di profesion un voorman di infrastructura pa entre otro ACI y Arubaanse Wegenbouw, el a cuminsa traha cu mashin
banda di e cocalnan na Barcadera, djey nan a traha e tankinan na Zeewijk. Zeewijk tawata un dump prome cu esey.
Juan tawata tin un pasion y e ekipo pa core e tuberianan di WEB rond di e isla completo, y asina crea cuponan di trabou den un epoca di
scarsedad, hopi mas prome cu e status aparte. Ta hopi hende a haya trabou. Campeon ta reconoce campeon. Marduga e ta lanta, pasa busca su
balente trahadonan. Tur sinta den baki di pick-up al estilo karioka, cu nan cuminda di merdia den man.
Tambe el a traha hopi caminda nobo di asfalt den e epoca di camindanan di tera y instalacionnan di desaroyo, verkaveling y di barionan nobo.
Den e mundo di deporte e tawata e prome den Caribe cu independientemente a traha e canchanan di tennis di asfalt, un
conocemento cu a hera wordo importa di afo, cu ekiponan caro y innecesario. E prome di varios ta na Costa Linda, den e epoca unda cu
nos historia di time-share a cuminsa. Prome cu esey, den e mundo di Drag Racing el a traha e Pista di Palo Marga. Pero tambe el a traha
SV. Caravel y SV Sportboys. E cas di Dera Gai, e orguyo y evento preferi di su difunto tata stima. (Un tradicion cu nan a bin cu ne
ariba, desde e tempo cu e tata tawata dirigi Club Trappers) Sportboys, tambe conoci como e cas di hisamento di fli, unda cu e isla completo
tawata bin competi, principalmente Angochi y Bisindario. Caminda cu hasta participantenan di nos hermana isla Corsou tawata bin exhibi, y
a introduci fli di caha y a pusta cu nos.
Parada di Carnaval di Kadushi Largo, futbol, domino, cah’i orgel y hopi mas. Eventonan nacional grandi y famoso. Organisa, engrandece,
manteni y dirigi pa Rufo Kelly (y ekipo) cu ta un otro Icono y Baluarte cu’n curason grandi pa su comunidad y studiantenan di Colegio
Laura Wernet Paskel. Yama pa Betico Croes q.e.p.d. como “Juan Jr” un amigo personal di nos Libertador Betico Croes. El a cana desde dia
uno, man den man cu Betico. Desde e momento cu Betico y Panchico Croes en felis memoria a cambia e bandera pa prome biaha. No ta un secreto,
cu ta hopi momentonan y decisionnan cardinal pa historia di pais Aruba a tuma luga na Angochi. Pero esey ta un storia pa un otro dia.
Como un persona cu a biba politica y historia di su pais di cerca, su deseo semper tawata pa no tin mas pelea entre colornan, sino amor y
cariño cu enfoke pa cu e desaroyo y expansion di nos pais cu adelanto di nos pueblo prome. Pa cuida e tiki mondi cu a resta, apoya nos
cunukeronan y trece nos cunucu nan bek. Re-introduci esaki na e generacion cu ta bini: kico ta nos cumindanan, remedinan di tera, e
maneranan y sacrificio di nos grandinan di antes. Nunca e tabata un persona materialista, semper el a bisa, rico of pober, nos tur ta bay
den e mesun caha. Rikesa ta loke bo por comparti cu esnan cu bo ta stima of cu ta den un momento di necesidad. Na su hogar semper tawata
tin un manera pa rek e cuminda, pa cualkier bishita inespera. Mescos cu su tata, cualkier porta cu e lo por a habri pa un ser ker’i, cu mil
amor el a habri’e.
Den e epoca di paga lomba cu lomba, e tawata yena cu felicidad, cada bes cu e wak e bandera di spantenbier bay halto y wak un famia nobo ta
drenta nan hogar. Cada bes cu el a pone dak riba un cabes, ningun hende no tawata tin mester di sa, basta cu e muchanan por a bay scol,
caba nan estudio y e cabesnan di famia haya un caminda pa por sosega despues di a pone pan riba mesa. Algun di nan ta lidernan den
comunidad awendia.
Su wowonan tawata briya so, ora cu e weita un logro di un di nan ta aparece den noticia cu e ta scucha tur santo dia. “Mi yiu, un hende
mester ta na altura ta kico ta pasando cu su pais.” Cosecha a duna fruta. Al final di dia, su ekipo preferi semper tawata Aruba. Un
homber di hopi fe, cu ta sinta resa tur anochi pa su famianan, unda sea cu nan por ta. Su yiunan y nietonan, su motibo principal pa hiba
nan conoce mundo y keiro cu nan.
Su burico preferi tawata yama: Bencho. Bencho tawata e burico di su ruman muhe mayo y su recien casa. Hunto nan tawata bai busca awa na
lagabena, sabanilla abou of Andicuri. Unda cu nan ta pasa den tur e seronan patras pa nan por bin bek cas durante su infancia. Su cabrito
preferi tawata yama: Dal’e Cảcho. Un dia su tata a yega cas haya e cabrito su cara tur na hariña, y e bisiña mal rabia. Y asina atardi,
pa ora e mes a yega cas el a haya sa cu anan y e bisiña a haya suficiente carni pa sopi y stoba.
Diasabra tawata dia di corta bestia, “Cada cochino tiene su sabado”. Ta hopi famia a come di e crianan y cosecha di Angochi. Un cos a bisa
semper si: “Come, pero no lubida, tin ta come, lubida”. Di chikito nan tawata criado di cabrito, carne galiña y entre otro, porco. Cana rond
cu stitchi den mondi, paso yuwana no mag drenta mes den cunucu. Hunga den barancanan of band’i dam. Piki palo seco pa fogon. Pa prome cu
solo sali, ya su ruman muhenan cuminsa cushina. Sino no tawata tin cuminda di merdia na trabou. Papa di Maishi Rabo, Pan Bati, bonchi di
tur calidad y demas cosecha. Cada rato cu no tin mucho coy haci, nan mester a bay na e bisiña curandera Marinchi di Ben y yuda nan atende
su bacanan, ora cu trabou caba e wega tawata: ranca e baca na su rabo pa nan wordo lastra, ta esey tawata coi hunga, u’n tawata tin coi
hunga y television. Ta un tawatin den cercania, ta cu suerte mag sinta wak.
Aruba tawata diferente, cada famia tawata tin nan bẻnde pa atende, awa tawata yobe mita aña, y ora tin trabou, frẻre ta duna dispensacion pa
bay cumpli cu famia na cas. Asina el a siña di su tata cu tur cas mester di un cacho pa cuida cas, su ultimo cacho yama: Chespirito. E
ultimo pushi? Wel el a haya tur sorto di nomber. Sin duda algun, no ta falta pa e rous e pushi tur mainta trempan, paso: “awo ta ora di yega
cas y ta bin yora na e baki di cuminda den porta”. El a stima bestia, el a stima hende.
Tur diamars ta dia di bishita su famianan y cana den bario. Di chikito su tata a hib’e tur entiero, cordando e pa apoya su hendenan den e
momentonan di mas dificil. Asina el a sigui y el a haci su best pa bay tur entiero, di infancia te grandi. Unda cu e ta topa su amigonan di
semper, cu’n ta falta un chansa, ta bisa nan: “Laga nos hari, pa e dia pasa bay”. Hasta den su dolornan di mas cronico, semper tin un alivio
pa hari cu su sernan keri. Semper el a bisa, un hende su grandesa ta su entiero, eynan bo ta wak ken tur a keda cu gana di dispidi y kico
tur esun den caha ta nifica pa su hende.
Dentro poco ta toca su turno, pa asina yega na su ultimo luga di sosiego. Homber semper dasha, cariñoso y atento. Hende di tur hende,
homber di pueblo, tremendo yiu, ruman, subrino, primo, casa, tata, welo, bisawelo, omo y amigo. Acompañando su kerida esposa q.e.p.d. den
Lus Eterno. Cu Luz eterno lusa pa nan, pa nan por sosega na Paz. Uni un biaha mas.
