Kudawecha/Calabas Square Garden – Shonnan ta domino di “upper high class” tabata tin weekend di rey na e unico domino square garden na mundo, esta 99 Bar & Restaurant na Kudawecha/Calabas! E poderoso team di Balashi Knights, bou guia di Glenn “Mobuto”, a enfrenta un biaha mas den e revancha di siglo nan rival di semper, esta Team Biba Lekker. Ya di tempran caba Balashi Knights a set up su “headquarter” dilanti 99 Bar & Restaurant pa asina nan “fine tune” nan blitnan, “just in case” si Biba Lekker dixidi di cuminsa “corta” pa asina nan tambe por “corta bek”!
Wel wel señores, rond di 8’or di anochi e prome chispa a spart y den un prome buelta sumamente emocionante Balashi Knights ta drenta half time cu diferencia minimo den score cu 11-10 na fabor! Manera ta custumber, 99 Bar & Restaurant un biaha mas a sa di sorpresa un y tur cu snacks soculento parti door di e flamante chicas Old Parr.
Segundo buelta ta bay aden y akinan por a observa nerviosismo na ambos banda di team caminda cu e score gradualmente ta gatia style di un pa mi un pa bo den direccion di meta final di 21 punto! Rond di puntuacion di 15, integrantenan di Balashi Knights a cuminsa observa un grawatamento straño cerca team Biba Lekker. Ta manera ta un nubia di sangura a invadi e luga y ta pikando integrante di Biba lekker so! Wel aki capitan di Balashi a duna e señal pa saca bleki di Pif-Paf y cuminsa flit pa loco! Den no time Balashi Knight ta cuminsa piki e puntonan necesario y pasando un “clean-board” Glenn ta clausura e anochi pa Balshi ta triunfa cu score di 21 – 18 ariba nan rival team Biba Lekker!
Shonnan keda pendiente! Keda pendiente! Wega grandi lo ta bay tin diabierna awor dia 11 di mei!! Team 99, e “home-team”, a challenge Balashi Knights pa un encuentro amistoso pa midi forza diabierna awor 11 di mei cuminsando pa 8’or di anochi na 99 Bar & Restaurant! Ya propetario di 99 Bar a cera un coleccion di ninja y mercenario sin misericordia pa enfrenta Balashi Knights, y ta manera e propietario a laga sa “in de wandelgangen”, aki ta caminda cu ta bay siña e hefe di Balashi Knights ta con ta huma ciga cu candela paden! Shonnan yegaaaaa diabierna awor pa 8’or ya cu ta wega grandi ta bay tin!!!