Diaranson anochi polis y brandweer a bay inmediatamente n’e mall chikito net pabao di e stacion di gasolin na Sero Blanco, caminda cu a ricibi informacion cu tabatin un baki di pickup na candela.
Tabatin varios caha den e baki di pickup, cu pa un of otro motibo a pega candela.
Un persona cu tabatin un brandblusser a tuma accion di biaha, pa cual na momento e bomberonan a yega, por a domina e candela aki.
E chauffeur tabata coriendo riba e caminda di Sero Blanco ora cu e candela bay halto den su baki di pickup. El a baha fo’i caminda, pa despues ricibi ayudo di un Bon Samaritano, cu su brandblusser, cu a facilita e trabao di bombero na momento cu nan a yega.
Abao benta por a tuma nota caha cu material inflamabel. Ningun hende a core peliger, ni tampoco edificio.