Den colaboracion estrecho cu 13 diferente scol y cu asistencia sublime di IBISA, Badminton Aruba a ranca sali cu un tremendo inicio di e Olympiada Escolar 2021. Ta trata di un torneo di 150 mucha participando atraves di 21 team cu ta competi cu otro den e categorianan di onderbouw y bovenbouw.
Durante e ultimo simanan e muchanan a bin ta haya un preparacion structura for di Badminton Aruba caminda na prome luga a introduci e muchanan na e deporte di badminton, splicando e reglanan di e deporte y enfocando riba e tecnicanan basico pa por practica badminton. Despues a sigui entrena pa mehora e condicion fysico di e muchanan y prepara p’asina nan por saca cara di nan scol durante e torneo. Dia 20 y 27 di Maart e muchanan a hunga cu passion y hopi competitivo pa nan team, dunando tur cu tin riba cancha.
E 6 miho team nan lo sigui bataya den e ronda final cu lo tuma luga dia 17 di april na Centro Deportivo Playa. Y di awo caba Badminton Aruba ta desea e finalistanan tur clase di exito.
Alaves kier a extende un palabra di gradicimento na tur e docentenan cu a entusiasma e muchanan pa participa, como tambe na IBISA cu a percura pa e torneo cana segun e reglanan di DVG. Un esfuerso di tur envolvi cu a haci’e posibel pa e muchanan por practica deporte, keda saludabel y pasa placentero cu otro tambe.
Badminton Aruba ta invita tur mucha cu kier cuminsa practica e deporte di Badminton, pasa Diasabra entre 9am – 10.30 am pa asina incribi. E prome 2 les nan ta gratis y si dicidi cu kier inscribi por haci esey. E miembrecia ta solamente Afl 35.00 pa 1x pa siman y Afl 45.00 pa 2x pa siman.
E dia nan di training ta Diaranson & Diasabra.
Badminton ta un deporte fun y bon.