BEIJING, China – Mo Huanjing a pensa, cu door di cende e cas unda e ta traha como babysitter na candela, tabata e miho manera pa soluciona su problemanan di placa.
E muhe di 35 aña, tabata tin debenan di gambling acumula di casi 9500 dollar. E tabata tin pensa cu door di salba e famia di e candela, e lo por convencenan di pag’e mas.
Asina ey, na juni aña pasa, el a pasa man cu’n lighter y a cende e sala di e apartamento unda cu e tabata cuida e muchanan.
Al contrario, den e candela a muri e mama di e famia, Zhu Xiaozhen, y su yiunan di seis, nuebe y 11 aña.
Lin Shengbin, casa y tata di e muchanan tabata riba un biahe di negoshi na momento di e sucedido.
Despues di a cuminsa e candela, Mo a huy di e apartamento, cual costo tabata balora na casi 3 miyon dollar.
Na februari ultimo, Mo a wordo condena na morto despues di a determina cu el a provoca e candela di manera intencional, y diabierna el a wordo ehecuta.
Den un carta revela durante e huicio, el a afirma: “Si mi morto por haci cu tur cos lo cuminsa di nobo, mi lo ta dispuesto na wordo condena na morto”.
E noticia di e ehecucion a provoca un reaccion grandi ariba Weibo, e ekivalente di Twiiter na China, unda cu e tata di famia asesina a bisa na su 2.6 miyon siguidonan cu e “demoño Mo Huanjing a wordo finalmente ehecuta”.