ZAGREB, Croacia- Un total di diescuater dokter a participa den e operacion di diescinco ora den un hospital di Croatia.
Un ekipo di dokter di e hospital Rebro di Zagreb, Croatia, a logra separa un par di morocho exitosamente. E babynan tabata uni pa un solo higra y e tripanana, di loke ta e prome caso den cual e babynan ta sobrevivi un operacion asina complica.
“Ta trata di e di dos caso na mundo di separacion di morochonan Siames den un situacion clinico asina complica. Y ta e prome caso den cual ambos morocho ta sobrevivi”, e director di e hospital, Ante Corusic, a declara den un conferencia di prensa na Zagreb.
E babyanan, Kristina y Valentina Tambolas, ta den bon estado di salud, aunke ainda nan mester haci algun operacion chikito mas prome cu nan por bandona hospital y entrega na nan mayornan.
Un total di diescuater dokter, shete di nan ciruhano, a participa den e operacion di 15 ora cual a tuma luga diasabra ultimo.
E muchanan, cu awo tin cuater luna, a nace prematuro, cu 33 siman y dokternan a lucha durante seis siman pa mantene nan na bida, prome cu a dicidi di opera, a pesar di cu e circumstancia tabata leu di ta ideal.
“Nan tabata tin e sindrome di transufion gemelo”, es decir, problema cu circulacion di sanger y e funcionamento cardiaco y renal, dokter Ruza Grizelj a splica.
Un di e muchanan, cu e circulacion comprometi, tabata sufri di presion y no tabata por a orina, mientras cu e otro, tabata sufri di hipertension y su riñonnan y su curason tabata exponi na un trabou excesivo.
Dokternan mester a separa nan den dos via e torax, como tambe e higra y e tripanan, for di e duodenum (parti di e dunne darm cu ta uni cu e stoma) te na e final di e dunne darm.
E hepatologo, Danki Mikulic a admiti cu, prome cu e operacion, su ekipo tabata hopi preocupa, ya cu nan no tabata sa sigur di con e circulacion entre e dos parti die higra lo desaroya.
E cuestion tabata pa purba, cu, contrario na e estado anormal te cu e ora ey, e prome di e morochonan stop sin problema, di “traha” pa e otro (pomp sanger pa su circulacion, curason y riñon) y cu e ultimo aki “asumi su mesun funcionnan pa su mes”.
Un factor di riesgo di e operacion tabata e estado precario di e muchanan, cu hunto, apenas tabata pisa 4500 gram.
“Tur cos a bay miho di loke nos a pensa”, Mikulic a conclui.