KAAPSTAD, Zuid- Afrika- Un baby recien naci a wordo haya den un saco di sushi, net prome cu e truck di sushi pasa piki e sushinan. Despues di un investigacion a bin haya e mama y esaki a wordo aresta.
Un persona local bendedo di cosnan bieu a scucha e yora di un baby. Y e zonido tabata bin for di un saco di sushi, pa cual a bati alarma cerca e compania local di siguridad Reaction Unit South Africa (RUSA).
ALGUN ORA DI NACI
E baby tabata lora den un jeans y tabata tin algun ora naci. “E lombrishi ainda tabata pega na e placenta. E criatura a wordo someti na un checkeo medico cu resultadonan positivo”, segun RUSA a scirbi ariba su pagina di Facebook. E baby a wordo transporta pa hospital y tabata pisa 2 kilo.
Si e baby aki, un mucha homber, no a wordo haya na tempo, e lo a wordo hiba den e truck di sushi, hunto cu tur otro desperdicio.
Trahadonan di RUSA despues di e hayasgo a pidi cooperacion di comunidad pa asina haya sa cual muhe di descendencia Hindu tabata na estado. Esaki door di e caracteristicanan di e baby. A resulta cu ni na shen meter leu di unda a haya e baby, tabata tin un muhe Hindu ta biba.
HAYA YIU SCONDI
Despues di a wordo ampliamente interoga, el a bin admiti di cu el a sconde su embaraso pa nuebe luna largo. “El a haci esaki pasobra cu su yiunan tabata di dos diferente tata. El a logra di duna lus den baño na momento cu su yiu homber di 11 aña y su yiu muhe di 9 aña tabata na scol.
E muhe a wordo aresta y acusa di intento di asesinato. Despues di e mensahe ariba Facebook, a drenta cerca di 420 peticion, di rond mundo, na e compania di siguridad pa adopta e baby. E peticionnan a wordo manda pa proveedornan di cuido cu ta esunnan cu ta zorg pa e mucha.