San Salvador, EL SALVADOR — Un baby di dos luna cu tabata den poder di e hombernan cu a mata su mama y tambe ruman muhe di e mama, wordo rescata, segun polis Salvadoreño.
E menor a disparce hunto cu su mama Diana Lisbeth Lemus Garcia, di 21 aña y ruman di esaki di 7 aña, secuestra pa supuesto pandiyeronan ora cu nan tabata bayendo cas despues di a yuda e mama riba un di e mercadonan di San Salvador.
Director general di Policia Nacional Civil, Howard Cotto, a confirma e rescate riba su cuenta di Twitter.
E dos rumannan a wordo asesina cu un tiro den cabes, loke Cotto a califica den un conferencia di prensa como un “acto di puro ehecucion” y nan curpa a wordo haya den un zona rural di Nejapa, 12 km for di e capital.
Segun investigacion di polis, mama di e baby tabata e hoben di 21 aña cu na 2016 tabata tin un relacion cu un miembro di e pandiya Barrio 18 Revolucionarios, cu tabata cera. E muhe a termina e relacion cu e pandiyero y a cuminsa un relacion nobo.
Polis ta sospecha cu e baby cu a disparce lo por ta yiu di e pandiyero y cu esaki lo a menasa e mama cu morto.
Pandiyanan ta wordo integra pa mas di 70 mil hoben y adulto y nan ta responsabel di e mayoria di e crimennan cu ta wordo cometi den e pais.