BOGOTA, Colombia- Autoridadnan ta investigando e posibel causanan di e crimen, sin descarta e ritual satanico y incluso e atake di un animal salbahe.
Un baby di 5 luna a wordo haya decapita, desmembra y cu signonan di tortura den oranan di marduga diabierna ultimo den un riu di e Vigia del Fuente, na Colombia.
Segun testimonionan recogi pa un corant local, e mama di e criatura a bati alarma ora cu el a ripara cu su baby no tabata den su cama. Di biaha bisiñanan a colabora den e buskeda te ora cu nan a topa cu e desenlace fatal aki.
Habitantenan di e zona a sigura cu e baby a wordo haya sin cabes, sin curason, sin un di su brasanan y cu su tripanan pafo. “Bo wowonan ta yena cu awa, e ta dunabo dolor. Ora cu mi a bin haya sa di e noticia aki, mi a puntra mi mes, te na unda e maldad di hende por yega?”, segun e ombudsman, Carlos Negret Mosquera.
Manuel Cuesta, alcalde di Vigia del Fuerte a señala cu e atribui e causanan di e homicidio aki na “ algo diabolico”. Di otro banda, e gobernador Yesid Gomez a declara dilanti canalnan di television cu e curpa di e baby, a aparece “cu signonan di aparente atake animal”.
Cuesta a agrega cu e asesinato ta sosode despues di e dos biaha cu nan ta kita e mucha for di e mama. Diahuebs caba den oranan di marduga nan a bin haya e mucha na canto di e riu. Sin embargo diabierna e famia no a core cu e mesun suerte.
E crimen a tuma luga den un zona di dificil acceso cu a haci cu autoridadnan a tarda pa yega. Lo haci e autopsia corespondiente pa determina e causanan berdadero di su fayecimento, mientras cu e investigacion ta sigui.