Paris, FRANCIA- Un operacion coordina pa Interpol contra di pederastia cu a cuminsa na 2017 cu e control di contenido cu ta circula ariba internet, a duna su frutonan. Te cu awo 50 mucha a wordo libera y ocho persona na Tailandia, Australia y Merca a wordo aresta.
Interpol a splica diahuebs den un comunicado cu e investigacion di e material haya den e operacion aki, bautisa como Blackwrist, unda cu casi 60 pais ta participa, lo por conduci na mas aresto.
Ademas, segun calculonan di e agencia policial internacional cu sede na Lyon, Francia, mas di shen otro mucha por tabata obheto di abusonan ariba red.
E investigacion a start na comienso di 2017 cu e descubrimento di contenidonan di e asina yama “darkweb” of internet scondi unda cu nan tabata mustra abusonan cu tabata wordo cometi na diesun mucha bou di 13 aña riba un pagina ariba cual tabata tin mester di subscripcion y cu tabata tin 63 mil miembro rond mundo.
E trabou di e Departamento di Investigacion Special di Tailandia den coordinacion cu Interpol, na cual mas pais tambe join pa traha conhuntamente, cual a permiti pa indetifica e IP di e pagina aki, na Merca.
Na november 2017 a identifica e prome victimanan y dos luna despues dos aresto a tuma luga na mes momento, na Tailandia y Australia.
Na Tailandia a aresta e adminsitrador, Montri Salagam, unda cu riba e paginanan en cuestion e ta wordo mira ta abusa di 11 mucha, un di cual tabata su mesun sobrino, y cu na 2018 a wordo condena na 146 aña di prizon.
Na Australia a detene un di dos administrador, Ruecha Tokputza, tambe pa abuso di menor (e mas chikito tabata di 15 luna), sentencia na 40 aña, e pena mayor den e pais aki pa pedofilia. Un otro leider di un creche cercano di Tokputza a wordo condena na 36 aña pa e mesun delitonan.