Diabierna 18 di Februari e Asociacion di Botica y AZV a firma un contracto. E firma cu sr Norman Arends, Tito Tromp y sr Anco Ringeling a pone bou di e acuerdo por wordo yama un hecho historico cu rason. Prome cu AZV a habri pa cliente na 2001 tabata tin conbersacionnan caba cu e grupo di botica y AZV pa yega na un acuerdo ora AZV lo bira vigente. Durante tur e añanan semper tabata tin palabracionnan entre AZV y e boticanan, pero nunca a yega asina leu di firma un contract.
No solamentee hecho cu e acuerdo cu a wordo maneha a bira un contracto formal ta algo positivo, pero tin diferente mehoracionnan den e contenido. Awor ta defini cu e doño di botica ta garantisa cu e boticario ta sigui e normanan di calidad di e KNMP (asociacion profesional di farmaceutico). Como un indicador di calidad un cantidad di linea di guia a wordo palabra:
Registracion y analisis di incidentenan unda e asegurado a ricibi informacion incorecto;
Registracion y analisis di kehonan di asegurado;
Intercambio stuctural entre dokter y farmaceutico tocante uzo di remedi;
Maneho di educacion pa personal di botica;
Control di dosis riba tur remedi pa muchanan bou di 12 aña;
Participacion activo pa cu uzo di remedinan preferencial.
Tambe a wordo palabra cu e doño di botica ta garantisa cu e botica lo upgrade nan sistema electronica pa por monitoria e uzo di remedi riba nivel halto. Otro cambio den e contracto ta cu e tarifa di suministro (receptregelvergoeding) a wordo poni riba 15,79 florin. E receptregelvergoeding ta un suma cu AZV ta paga e botica pa cada remedi riba un receta.
E firmamento aki ta un signal cu e confianza a crece na un nivel unda por papia riba e calidad di cuido cu ta wordo duna na e aseguradonan di AZV. Tanto AZV como e boticanan ta spera di continua di colabora den bon forma.