Durante un conferencia di prensa diamars mainta na oficina principal di AZV, a informa e pueblo di Aruba di e Prome Aruba Health Fair, cual lo tuma luga dia 8 di juni 2019. Durante e Health Fair aki, comunidad lo por haya hopi informacion di salud, movecion, actividadnan, workshop y cumindanan saludabel. Director di AZV, Sr. Ruben Goedhoop a splica tocante kico por spera ariba e dia aki.
Sr. Goedhoop a cuminsa na splica cu e proyecto aki ta pa prome biaha ta traha un evento asina grandi, unda cu ta focus solamente ariba salud. E Aruba Health Fair lo ta pa tur hende y e ta un banda, un evenemento cu ta duna informacion. No ta trata di solamente scucha, pero di un forma practico, bin cu workshop, haciendo e topico di salud hopi mas interesante. Den e workshop aki lo trata con pa cushina den un forma saludabel. Asina ta spera cu e topico di salud ta bira mas practico tambe. Lo tin un skina di actividad, cu e famoso Dunk Tank. Lo zorg pa tin personanan clave sinta ariba e stoel y esaki ta e chance pa bentanan na awa. Lo bay tin ‘live band’, durante full e evenemento. Y claro tin tambe hopi stand di cuminda saludabel y bebidanan tambe.
En corto, e ta un evenemento completo. E ta un evenemento cu ta focus pa atrae mas hende posibel pa asina trece e topico di salud mas cerca di e clientenan, cu ta e pueblo di Aruba. E evenemento mes lo tuma luga dia 8 di juni, ariba un diasabra. Esaki ta pa asina atrae mas hopi hende posibel. E ta un diasabra atardi te anochi, pa asina ta sigur cu e no ta mucho calor, unda cu den oranan di atardi pa anochi, pa mas o menos 11 or.
E evento mes lo tuma luga na AZV Square Garden (Parkinglot). E lo ta full rond di e edificio di AZV lo bira un metamorfosis, unda lo tin un stage, cu banda tocando. Full e area rond di AZV lo transforma den Aruba Health Fair, cu e topico di salud.
Mas aleu, Sr. Goedhoop a sigui bisa cu di un banda, e ta pa un banda, duna informacion na pueblo, kico nan por spera di un AZV. Pero tambe di otro banda, duna otro organisacionnan un chance, pa brinda nan servicio, pa brinda informacion ariba topiconan manera prevencion, cuido di nos grandinan, nos babynan. Cuido en general.
Pa e evenemento ta mas accesibel pa tur hende, a dicidi cu mucha lo ta gratis, te cu 16 aña. Entrada pa adulto ta solamente Fls. 5,-. A purba tene esaki mas abao posibel, pa nan gosa di e evenemento. Tin full un team trahando ariba dje, pa asina logra cu e proyecto aki ta uno exitoso. Nan a duna hopi di nan tempo priva, tambe, pa traha y organisa e evenemento aki. Y tambe, Sr. Goedhoop a gradici e ekipo pa nan trabao. Tambe el a gradici e sponsornan, caul ta varios y cu ta hopi entusiasma pa participa den e evento unico aki. Y ainda nan ta spera mas sponsornan tambe cu ta sigui y join AZV.
Sin e team y sin e sponsornan, esaki no tabata posibel (Aruba Health Fair).