E proyecto di opschoning di e Registro Civil cu a ser haci pa Censo tabata algo masha positivo pa AZV. Vocero di e instancia, Solange Tchong, ta splica mas di kico ta nan punto di bista pa esaki.
AZV ta para tras di e proyecto aki. Manera cu ya ta conoci, AZV cu Censo ta trahando hunto pa algun aña caba. Pa nan e ta solamente beneficio e por trece. Cu esaki Tchong ta ilustra cu un partido ta yuda otro. AZV na final di 2016 a yuda Censo cu datonan cu nan tin den administracion di nan clientenan. Esaki no solamente a sosode na final di 2016, pero tambe a entrega nan un lista pa loke ta e aseguradonan cu nan tin na AZV. A haci’e pa hustamente yuda y bay compara dato, pero bay wak tambe unda tin posibilidad pa mehoracion. Esaki ta pa yuda Censo di un forma of otro pa nan tambe bay investiga cua ta e clientenan cu berdad ta biba na Aruba, inscribi na Censo, pero en realidad biba na Aruba y kendenan tabata tanto pa nan, importante pa haya sa, pero tambe ta e seguro di AZV.
Tchong a sigui splica cu AZV di su banda semper durante varios aña caba a haci hopi esfuerso pa percura pa tin un bon dato of registro di su clientenan. Si por corda, a haya den situacion na 2006, ora cu AZV tabata tin un sucursal na Boulevard, unda cu mester a haci un reregistracion. For di e tempo ey caba y despues na 2010, y asina a sigui, tabata tin diferente intento cu a resulta positivo, na unda ya caba a cera diferente polisa di e clientenan pasobra nan tabata ripara cu ta hendenan cu aparentemente no tabata biba na Aruba mas. Bisando esaki, a kere cu e opschoning di Censo ta solamente algo positivo pa nan. Den teoria AZV ta kere cu kisas e por berdad toch resulta den gastonan inecesario of gastonan cu tabata cubriendo, pero ta wak’e toch como gastonan hopi minimo pasobra eigenlijk, door di e intentonan, cada 4 of 5 aña cu tabata haci, unda cu nan mes tabata controla na dato y awor aki na 2017, e ta mas intenso, pasobra awor aki ta traha cu Censo, unda cu diariamente ta haya loke nan ta yama e cambionan.
Pa Tchong di parti AZV tin 108.431 hende sigura cu sigur ta hopi positivo pa AZV ta den su sistema di registracion. Nan ta cumpli cu loke ley di AZV ta sigura. Articulo 3, cu ta stipula cu bo mester ta inscribi na Censo y bo mester proba esaki, por medio di un inscripcion di Censo, esta e conocido papel di 5 florin. Banda di esaki tambe tin cu cumpli cu bo mester ta biba na Aruba. Pa AZV esey ta e base y esey ta haci cu AZV tin actualmente tin 108.431 asegurado registra y e personanan aki, cada un tin nan dokter di cas fiho registra na AZV, nan Botica y nan Dentista tambe.
Loke ta importante pa sa ta, cu loke ta e organo ehecutivo AZV, como instancia, no ta haci e parti di retencion di prima. Esey ta un tarea cu Servicio di Impuesto di Aruba ta haci. Loke AZV si ta haci, ta cu nan tin cu controla, of monitorea si e clientenan cu ta bin inscribi na AZV y kier haci uzo di AZV ta cumpli cu e reglamentonan den ley. Bisando esey si, e 108.431 persona aki a cumpli cu AZV pa loke ta documentonan cu nan mester a entrega pa prueba cu nan tin un base cu nan ta inscribi na AZV. Pero e ta para los di loke ta e parti di retencion di prima, pa loke ta bay pa Servicio di Impuesto. Tin cu tene cuenta cu e mesun ley di AZV ta permiti si, esta AZV ta conciente y sa, cu por tin personanan, cu si ta inscribi na Aruba, pero por ehempel a bay biba tres luna na Corsou, of a sali un cuater luna afo, e personanan aki tanten cu nan ta inscribi na Censo, nan tin e derecho di haci uzo di e AZV. Esey kiermen cu ora nan a sali for di Aruba, nan no ta na Aruba, nan no por haci uzo di dje tampoco. Pero si nan a bin bek, e momento ey si nan por haci uzo di dje, contal cu nan ta legitimamente inscribi na AZV, cu nan a wordo comproba cu nan ta inscribi. E situacion ey tin. E ta conoci cerca AZV.