AZV ta evalua cada biaha di nobo ora ta trata peticion pa bay den exterior pa cuido medico. No ta asina cu pasobra bo a yega di sali caba afo pa tratamento medico, esey no ta un argumento cu nan lo bolbe bay hiba bo. AZV ta wak cada biaha e condicion fisico, salud y situacion den cual bo enfermedad ta.
Den e parti di Oncologia por ehempel tin diferente grado di e malesa, y esey e mediconan ta evalua. Ta evalua si tin otro complicacion y condicionnan tambe. Esey ta haci e cu no ta tur ora expertonan medico por tuma un decision rapidamente. Banda di esey, ta evalua si e peticion ta cay bao cobertura di AZV.
Albertico [Tico] Valdes, un pashent cu Cancer terminal, a expresa su disgusto ultimo tempo cu mundo medico na Aruba, expresando cu tin trato inhumano y falta di cuido, na unda cu awor nan no ta ni atende na Eerste Hulp mas ora cu e tin dolor. E ta sinti cu portanan ta sera p’e siendo cu e ta un pashent buscando sosten pa su salud.
AZV a tuma nota di e situacion di sr. Valdes y ta asina cu sr. Valdes su caso a wordo conoci na 2018 ora cu el a bay pa prome biaha prensa y expone e tempo ey un diferencia di opinion pa loke ta su caso y condicion medico. Segun AZV, ta asina cu berdad nan tabata tin un evaluacion cu mester a tuma lugar cual a resulta na su fabor na unda cu tog AZV – pa medio di e comision CGZ [Commissie Grensoverschrijdend Zorg] cual ta comision di expertonan medico cu ta evalua tur peticion cu drenta AZV – a dicidi e tempo ey pa sr. Valdes bay Colombia pa tratamento. “Nos mester corda e ley di AZV ta stipula hopi biaha cu mester tin cierto criterio na cual un pashent ta cumpli medicamente, y esaki ta wordo controla por medio di CGZ pa asina por saca pashent afo”, segun Solange Tchong, vocero na AZV.
Locual ta pasando awor ta cu sr. Valdes mes a manda un peticion pa AZV. Normalmente e proceso ta bay via un specialista den pashent su nomber ta haci peticion na AZV anto despues CGZ ta evalua e caso. AZV a compronde for di pashent Valdes cu tin diferencia di opinion riba su caso, y for di esey a resulta cu dia 27 October, 2020, AZV a ricibi un peticion di sr. Valdes. Dus awor tin algun siman cu e comision ta evaluando su caso, e mesun comision di dokter ta encarga cu e evaluacion aki.
Un caso ‘basta complica’
Riba esey ta e parti cu sr. Valdes a indica cu e tabata pendiente di AZV pa un reaccion. E caso di sr. Valdes ta ‘basta complica’ segun AZV, e ta medicamente complica cual ta resulta cu ta tuma par di siman extra prome cu por tuma un decision. “AZV su trahadonan, incluyendo departamento medico ta mara na secresia medico, y pa tal motibo nos no por divulga tur detaye pasobra nos no ta kere cu esey ta e situacion mas miho y no ta prudente pa discuti detayes medico den publico, esaki nunca ta e caso pa AZV”, segun sra. Tchong. Pero como sr. Valdes a expone e parti aki publicamente e kier a laga sa cu e tin un decision pendiente cu AZV, nan por toca e tema y bisa cu si nan tin atencion na su caso. Y como AZV, seguns sra. Tchong ta splica, nan ta haciendo lo mas posibel pa por yud’e dentro di e ley di AZV, dentro di loke e seguro medico di AZV por cubri p’e, esaki nan ta bezig ta evalua.
Ta pendiente riba un evaluacion medico ainda pa e ora ey e por haya un contesta di AZV pronto pa cu e peticion cu el a haci.