Vocero di AZV, Solange Tchong kier garantisa tur asegurado di AZV cu na momento aki e parti financiero no ta impone riba decision si un tratamento ta medicamente necesario pa un pashent, e pashent lo ricibi esaki.
“Pero, e medicamente necesario pa AZV como seguro mester di expertonan pa evaluacion. Nos mes tin un departamento medico den AZV, pero nos departamento den AZV ta pa hunto nan evalua tur caso cu e comision CGZ”, segun sra. Tchong. AZV nunca ta tuma un decision independientemente nan so pasobra e decision mester ta obhetivamente tuma, basa riba e condicion y circumstancia. Riba e parti financiero, berdad AZV a haya un sla tambe manera henter Aruba por medio di e pandemia.
Nan ta mara na cierto instruccionnan cu Aruba a tuma hunto cu Hulanda, pero na momento aki AZV ta bisa cu nan tin mas pashent pa bay Sali pa exterior pa cuido medico. AZV ta warda pa e pandemia cuminsa baha pa tur pais por ‘flatten the curve’ y di forma cu ta bira mas safe pa por saca pashent afo.
Cuido medico den exterior
Tin mas o menos 90 pashent cu AZV a manda peticion pa manda un cita na Hulanda. Pero Hulanda tambe tin su retonan pa keda domina e pandemia, bo ta wak e den nan cifranan. “Nos tambe ta sinti e resultado di esey,pasobra bo ta haci un peticion pa haya cita y nos tin cu warda”, segun sr. Tchong. Dus awor tin mas o menos 90 pashent pendiente pa sali pa Hulanda pero mester warda te ora Hulanda duna AZV e cita; tin algun por sali e aña aki ainda, algun lo mester sali otro aña.
Evaluacion di e casonan aki ta a base di grado y nivel di e malesa. Tur pashent cu ta responsabel pa mantene na Aruba cu nan por warda pendiente nan cita, ta keda warda. Tur otro pashent cu mester sali, AZV ta saca nan. Tin alrededor di 15 persona pendiente pa ora cu cos regula completo, nan lo por sali. E otronan ta pendiente cita cu a wordo pidi caba na Hulanda y tambe Colombia, cu si tur cos bay bon frontera lo habri pa 1 December bek, segun cu e citanan drenta, AZV lo cuminsa saca e pashentnan aki bek. “Ta rekeri pasenshi di e pashentnan pasobra nos sa cu tin di nan tin hopi molester di nan malesa, ta purba yuda cu remedi pa nan por ta un tiki trankil te ora nan haya nan afspraak den exterior”, segun sra. Tchong.
Den un caso no urgente, e ta varia entre dos te cu maximo cuater siman pa AZV contesta, pero tin casonan caminda ta hopi mas dificil pasobra tin cu pidi mas evaluacion di afo por ehempel. AZV sa haci peticion tambe pa Hulanda duna informacion riba kico nan ta pensa di e casonan mirando cu nos ta cay den Reino.
Semper ta purba den un lapso cortico ora un peticion drenta AZV, den un situacion normal lo ta entre dos pa cuater siman, cual ta casonan no urgente of semi urgente. Casonan di suma urgencia semper den lapso di 12 ora bo por bay afo; por ehempel casonan di accident di auto of candela.