Manera nos tur sa hopi hende a yega di bira malo pafo di Aruba y ta bon pa corda tur hende busca nan seguro di biahe paso bo azv no tin valides pafo di Aruba segun Sra. Solange Tchong.
Na momento cu bo bay biaha, y bo bira malo den exterior, ta importante pa tin un seguro di biahe. E prome recomendacion cu AZV por duna, ta cu si bo a reserva y paga bo vakantie caba ta hopi importante pa cumpra un seguro di biahe. AZV no ta bendiendo seguro di biahe, pero si companianan di seguro comercial, ta bende esaki.
Segun Sra. Tchong, importante ta pa no solamente planea un vakantie, pero planea tambe den e presupuesto di diferente compania di seguro comercial cu ta bende e seguro di biahe online cual ta haci’e hopi mas facil cu si bo ta sinta mes na Airport, bo por bay online y paga pa bo seguro di biahe. E seguro di biahe ta inclui tambe seguro pa accidente, dus e tin varios componentenan.
Un otro recomendacion ta pa check bon cual pais bo ta bayendo pa check si e pais aki lo mester di un vacuna pa drenta. Esaki paso cu tin varios pais cu ta conoci cu tin epidemianan di keintura geel, of cu tin otro riesgonan cu e persona por core. Dus ta importante pa sa di esaki y informa over di esaki na Departametno di Salud Publico.
AZV ta di opinion pa biaheronan tuma nota di esaki tambe. Si e biahero ta bay cierto paisnan manera Suriname y Brazil, of e ta bay un pais cu tin otro tipo di malesanan cu por tin riesgo, ta importante pa informa y tuma e vacuna, segun Sra. Solange Tchong.
Den pasado a papia di bay hasi AZV como un seguro general cu por ser usa pafo di aruba pa cual Sra Tchong ta splica di e pensamento aki. A yega di haci un investigacion ariba seguro di biahe, pero Gerencia di AZV a opta toch pa no sigui cu esaki, pa motibo cu tabata tin hopi componentenan cu mester bay tene na cuenta.
Tambe a haci un investigacion pa loke tabata un seguro adicional lo por wordo bendi door di AZV mes. Pero esaki ta un area cu lo mester wordo explora ainda, pero loke si a sali afo tabata cu si bo bay haci’e bo ta core basta riesgo, y cu tin mas factor pa tene cuenta cun’e.
Dus AZV a pone e puntonan aki pendiente, y si den futuro lo bin bek ariba esaki. Lo mester haci cambio den ley y cu lo mester camina den futuro. A opta pa awo pa no haci’e. A opta, p.e. Pa un seguro medico adicional y si ta interesa den esaki, acerca un seguro comercial ya cu nan ta bende paketenan adicional ariba seguronan di AZV. Dus por informa ariba cualkier compania comercial, pa haya mas informacion.
Esey ta un di e posibilidad y teniendo na cuenta cu e AZV di Aruba ta un pakete basta amplio compara cu sistema di otro paisnan grandi, segun Sra. Solange Tchong, di AZV.