Tin un mal contento cu na Pais Colombia for di e clinicanan cu ta duna servicio Medico cu ta critica riba e comportacion di nos hendenan local cu ta compaña pashentnan. Solange Tchong, vocero di AZV, ta comenta cu AZV for di 2001 cu a habri, AZV tin e parti di unda cu ta regla e biahe y estadia tambe pa pashentnan cu tin cu haya cuido medico den exterior. Ta papiando di pashentnan unda cu un peticion a drenta AZV y a haya aprobacion di AZV pa bay den exterior. E ta asina cu ta enfrentando awor aki diferente keho cu a haya vooral di pais Colombia, unda cu ta contracta cu e miho clinicanan cu tin eynan. Ta enfrentando e señal y reclamo unda cu hopi biaha e acompañante social, e persona cu ta bay compaña e pashent durante di su estadia cu e tin cu bay haya tratamento, no ta comportando debidamente of nan no ta tuma nan tarea na serio.
AZV di su banda hopi biaha ta duna recomendacion na e cliente ora cu scoge un acompañante social, tin cu corda kico ta e tarea di un acompañante. Ta recomenda pa pensa bon ken bo ta hiba cubo den exterior, pasobra e persona aki mester ta un persona pa cuminsa, uno di confiansa dibo, un persona hopi cerca, un persona cu ta na altura di bo malesa y tambe na altura di bo deseonan, si surgi cualkier eventualidad.
Tchong a splica cu demasiado biaha ta haya e reclamo cu e hendenan ta tumando esaki manera un tiki mucho lihe. Nan ta bay e prome dos dianan ta bay bon, pero e di tres dia tin biaha e clinica ta yama AZV y ta bisa cu no por haya e acompañante social. El a sali bay shop for di mainta tempran y ya pa atardi ainda no por comunica cun’e, siendo cu tin mester di dje pa por tuma cierto decisionnan hunto cu e pashent of pa e pashent. Ta papia tambe di un comportacion na unda tin ora e hendenan ta exigi cierto cosnan di e clinicanan unda cu e no mag. Cu esey Tchong ta referi cu AZV tin acuerdonan haci cu e hospitalnan aki, tambe over di proceduranan, por ehempel over di afspraaken, ki dia nan ta wordo haci, testnan, cuanto dia esaki por dura si of no, cu ta splicacion y informacion cu nan por haya di e clinica of di e departamento internacional di e clinica. Pero atrobe kico ta sosode, cu tin algun acompañante social cu no ta tuma e tarea na serio y na e mesun momento tambe no ta informa debidamente.
Ta importante cu tur asegurado cu tin cu bay tuma tratamento pafo di Aruba, hiba un hende cu sa di kico e pashent ta sufri di dje y cu tin un bon comportancion segun sra Solange Tchong ta splica
Ta importante pa cada asegurado di AZV ta hopi conciente cu ora cu sali como pashent via AZV, tuma bon nota cu ta hiba un persona di confiansa cubo y un persona tambe cu tin un comportacion recto, cu banda cu e ta domina e idioma di e pais cu ta bay, por ehempel si ta bay Hulanda, percura pa e hende cu ta bay cubo ta papia bon Hulandes, pero tambe ta kere cu ta hopi importante pa e persona aki ta un persona recto cu sa pa busca bo derechonan, pero na un forma respetuoso, un forma bon.
Un otro ehempel cu por duna di comportacion ta compañantenan social cu ta bay bishita e pashent, cual ta hopi bon, pero nan ta bin bishita e pashent por ta un dia un tiki burachi, of nan a sali fiesta full un anochi prome y ta yega e ora hospital cu un tiki mal beis y hasta baha e mal beis aki riba e empleadonan, sea e nursenan di e hospital of e empleadonan di e departamentonan internacional cu ta traha cu AZV. AZV ta kere cu esaki toch ta un tiki preocupante. Pasobra como Aruba, bo ta keda toch un isla dependiente di otro paisnan, dependiente di servicio di afo, cual bo kier toch pa esaki keda bay bon, pa bo tin un bon comunicacion cu nan y bo no kier pa Aruba su nomber haya un mancha afo. Como AZV ta echt kere cu ta hopi importante pa cada un di nos sea abo como pashent of awe mañan si bo ta pensando pa compaña un persona pa su cuido medico den exterior, tuma bon nota cu e rol aki ta uno hopi serio, uno hopi delicado tambe pasobra atrobe bo por hayabo den situacion unda abo tin cu tuma un decision entre bida of morto y esey no ta algo cu bo ta duna sin mas.