Dia Internacional di Cobertura Universal di Salud ta e dia cu mundo henter ta wak e meta di e seguronan medico cu cobertura universal di salud, esta cobertura pa tur ciudadano di e paisnan. Algun tin’e caba, otro ta bogando p’e. Pa AZV esaki tabata motibo pa tene su prome ‘Universal Health Coverage Event’ cual tabata tin como meta pa informa tur su empleadonan, dunadonan di cuido y partnernan tocante e proyectonan pa 2020.
Apertura di evento
Minister di Turismo, Salud Publico y Deporte, Dangui Oduber a habri e evento cu palabranan inspirador pa tur presente. Seguidamente director Ruben Goedhoop a presenta e proyectonan realisa ya caba den 2019 y plan 2020. Algun proyectonan realisa tabata cu a yega mas cerca di aseguradonan pa medio di sesionnan informativo aseguradonan cu a bay Colombia, a activa e FB page cu testimonionan real y campagnanan manera #Bo tabata sa, a organiza e Aruba Health Fair y a duna atencion special pa e salud di hende homber riba dia internacional di hende homber. A drenta diferente grupo di trabou por ehempel cu PAHO pa planifica un plan nacional di prevencion pa cierto malesanan.
Dentro di e plan 2020 a incorpora e.o. negociacionnan avanza cu hospital pa un contrato nobo basa riba puntonan specifico. Lo traha mas di cerca cu ImSan como tambe Respaldo pa sigui mehora nos cuido medico. Adicionalmente lo introduci ‘zinnige zorg’ (tratamentonan medico cu realmente tin sentido lo wordo duna pa asina evita tratamento of cuido medico innecesario y kisas hasta molestioso pa pashentnan) y lo traha hunto cu tur dunado di cuido pa ‘tackle’ e temponan di espera.
Vision y mision nobo
AZV a presenta su vision nobo cu ta incorpora cu AZV lo provee servicio profesional di e nivel di mas halto posibel den un forma eficiente y efectivo riba tereno di cuido medico pa su miembronan y dunadonan di cuido, buscando constantemente pa ta e seguro nacional lider den Caribe. Dentro di e vision ey, AZV tin e mision pa garantiza e calidad, accesibilidad y sostenibilidad di e cuido medico pa tur ciudadano di Aruba. AZV lo haci door di un compra di cuido medico minucioso, responsabel y manehando e cuido den gastonan aceptabel.
Logo nobo
Relacionista Publico, Joost van de Kamp, a presenta e componentenan cu a resulta den un logo nobo pa AZV. E ‘fundeshi’ di e logo ta basa riba 3 componente importante, y e componentenan aki ta e tres pilarnan (balki den logo) di AZV cu ta representa 3 punto clave di e vision y mision, esta cuido di calidad, accesibilidad pa tur hende y gastonan aceptabel. Adicionalmente e logo ta inclui 4 triangulo cu ta fungi como flecha cu ora e ta mustra direccion ‘pariba’ e ta nifica e calidad di cuido mas halto posibel y ‘abou’ ta nifica cuido medico na gastonan aceptabel. E letternan “AZV” ta mescla dentro di e ronchinan den fondo ilustrando e envolvimento di AZV den e comunidad di Aruba.
Premio Dokter di cas di Aña
Na januari 2019 AZV a introduci un Rating App unda e aseguradonan por a midi e servicio di nan dokter di cas. Basa riba e resultadonan di e Rating App, AZV tin dos dokter di cas cu a keda nomina como dokter di cas di aña y esakinan ta dokter Aurystella Wever y dokter Melissa Wever. Ambos a ricibi nan merecido bouquet di flor y gradicimento di AZV. Finalmente, e clientenan di AZV a scoge e ganador absoluto cu ta dokter di cas Melissa Wever.
Deseo
AZV ta desea comunidad di Aruba henter feliz dianan di fiesta y un prospero aña 2020 yena di hopi dicha, bendicion y salud.