Den luna di maart a cuminsa un provedor nobo di sapato ortopedico. Podo OrthoCare Aruba, di señora Kimberly de Groot (Podiatra – Podotherapeut), ta brinda solucionan profesional y personal pa un variacion grandi di problemanan di pia.
AZV a cera un contrato cu Podo OrthoCare Aruba pa sapatonan na midi:
- sapato semi ortopedico
- sapato otropedico
- OVAC (adaptacion ortopedico di sapato)
Pa suministracion di sapato (semi-)ortopedico tin mester di un indicacion y referencia previo di un specialista medico, den mayoria di caso esaki ta un dokter di revalidacion of un ciruhano (ortopedico). Mester tene cuenta cu ta existi un aporte propio di 125 florin pa adulto y 62,50 pa muchanan bou di 16 aña.
Si bo tin djies un pregunta of kier un conseho por pasa Podo OrthoCare Aruba sin carta di referencia.
Banda di suministracion di sapato na midi, Podo OrthoCare Aruba tambe ta suministra sapato normal y plantia ortopedico. Por lo demas Kimberly de Groot tambe ta duna tratamento podoterapeutico, pero esakinan no ta wordo cubri door di AZV.