AZB lo organisa Fina Coaches Clinic pa “beginner coaches” cu un Fina Coach certifica pa Aruba y Caribe

Mas cu 50 instructor y coach na Aruba a inscirbi pa e Fina Coaches Clinic pa “beginner coaches” organisa pa Arubaanse Zwembond e dianan 16 pa 20 di September proximo. Inicialmente AZB a spera un acogida mas abou pero mirando e cantidad di inscripcion esaki a kibra tur expectativa. Mester bisa cu Schoolzwemmen Aruba a inscribi tur nan instructornan mescos e clubnan di competencia cu ta manda nan coachnan mientras esnan di diploma zwemclubs (Elementair Zwemmen) tambe ta manda nan instructornan.
E expertonan Arubano certifica pa Fina, Mayens Tromp y Sandy Rasmijn-Leito lo ta esnan encarga di e clinica aki. E curso tin un duracion di 4 dia y mey mientras e ultimo dia tur participante lo pasa un examen. E federacion mundial di landamento, FINA a pidi 20 landador forma parti di e programa. E meta di e curso aki ta pa amplia e conocimento di tur e participantenan riba cada “slag” cu un mucha mester siña pa ta exitoso den mundo di landamento. E curso ta consisti di teoria y practica y lo tin un duracion di aproximadamente 6 ora pa dia. Na banda di e conocimento amplio cu cada curisita lo haya, esaki lo yuda tambe na na hisa e nivel di nos atletanan di landamento y engrandece e deporte un tiki mas y hiba esaki na un miho nivel den nos region.
Un danki sigur na Lotto, e Loteria di Aruba pa medio di Comision di Subsidio cu a subsidia e curso di Fina Coaches Clinic pa “beginner coaches” organisa pa Arubaanse Zwembond.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.

Comments

comments