Gerencia di Aruba Wastewater Sustainable Solutions (AWSS) a reuni cu varios stakeholders y interesadonan; KvK, ACF, AHATA, ATSA, Amsterdam Manor y Rotary durante ultimo siman nan pa informa y duna presentacion riba e solucion a corto plazo (short-term) cu a wordo implementa na e planta di Bubali pa procesa awa sushi, pero tambe e solucionnan moderno a largo plaso y proyecto nan den preparacion pa e proximo añanan.
Na juli 2024 e operacion y maneho di e planta nan di procesa awa sushi na Bubali, Parkietenbos y Zeewijk, tambe e infrastructura di rioolering a wordo traspasa for di Land Aruba/DOW pa AWSS por medio di e Landsverordening overdracht rioolnetwerk en vuilverbrandingsinstalatie (AB 2024 no. 23). Pa e transicion y proyectonan andando por cana structura, AWSS y DOW ta trahando hunto den un fase transitorio.
Kico a wordo haci te cu awor?
Desde e traspaso, AWSS a cuminsa di biaha e prome proyecto grandi cual ta e solucion a corto plazo pa e planta di Bubali. E planta na Bubali tawata trata e awa sushi cu ta yega, pero no por a trata esaki suficientemente pa cumpli cu e cualidad desea, mirando cu e planta su capacidad tawata diseña pa trata un volumen di awa sushi mas abou. Cu tempo y hopi desaroyo den e area turistico, Oranjestad y Noord, e volumen di awa sushi cu ta drenta e sistema di riool y ta yega e planta na Bubali a crece y surpasa e capacidad di cargo di e planta. Cu e proyecto a corto plazo, e meta ta pa e planta tin suficiente oxigeno den e aeration tank existente pa por procesa e cantidad di awa cu ta yega planta awe y pa e proximo añanan, asina percura pa trata e awa sushi adecuadamente te ora cu e planta nobo na Bubali ta operacional. Como parti di e proyecto a cuminsa na 2024 cu e diseño, ingenieria, fabricacion y logistica pa trece varios componente pa Aruba. E proyecto ta encera dos fase; e prome fase ta pa cambia e ekiponan anticua na Bubali cu ekipo nan moderno y cu capacidad mas halto. E di dos fase ta pa digitalisa e operacion completo di e planta nan di procesa awa sushi. Durante e ultimo luna nan a cumpli cu varios tarea di e proyecto y ta drentando e fase di finalisacion. E ekiponan nobo ta instala y ta den funcion, desde fin di april varios test a wordo ehecuta riba e sistema prome cu esaki por a bai den operacion normal. Alabes a instala e sistema pa maneha e planta di forma digital, di cual a haci varios test durante e delaster tres siman.
AWSS ta informa pueblo cu desde medio mei lo por cuminsa experencia e efecto nan positivo di e cambio nan ehecuta na Bubali su planta, caminda e planta lo ta den un bon condicion pa procesa e awa sushi cu e ta ricibi den un forma adecuadamente. AWSS su meta pa e proximo luna nan ta pa improvisa e cualidad di e awa procesa na e nivel cu ta conforme e norma nan.
Solucion a largo plazo
AWSS ta wordo asisti door di Royal Haskoning pa loke ta e solucion a largo plazo pa e planta na Bubali, cual lo encera construcion di un planta completamente nobo cu lo reemplasa e planta existente na Bubali. E planta nobo ta diseña pa tin e capacidad pa procesa 18.000 m³ di awa sushi pa dia, esaki ta pa e capacidad actual y e capacidad proyecta pa futuro desaroyonan. Pa keda cla cu e planta aki ta informa cu lo dura algun aña di trabao continuo, e trayecto di destaho ta den ehecucion y ta sperando di ricibi contesta di participante nan fin di juni 2025.
Planta nan na Parkietenbos y Zeewijk
Despues di e traspaso, a ricibi e planta na Parkietenbos den un estado no operacional, a ehecuta trabou nan grandi den e luna nan di juli te cu november pa asina por a continua cu operacion na Parkietenbos. Durante e proximo luna nan lo cuminsa cu proyecto di modernisa e planta di Parkietenbos y digitalisa e sistema, similar na Bubali. Tin proyecto grandi planea pa e planta di Zeewijk, caminda lo haci mantencion grandi riba 5 tanki, reemplasa e ekipo nan bieuw, modernisa e proceso, instala un pre-treatment y un effluent buffer tank nobo. E planta na Zeewijk lo ta e prome di e tres planta nan caminda lo instala un tanki special pa truck por bin busca awa trata den un forma accesibel y na un prijs ameno. Tin algun contratiempo pa cuminsa cu e proyecto aki, pero ta premira cu por cuminsa fin di mei.
Contratiempo
Mientras cu AWSS ta den e fase transitorio, trahando riba solucionnan a corto y largo plaso, a haya sorpresa y obstaculo cu ta tranca e proceso. AWSS a tuma nota cu HORECA ta descarga cantidad di azeta den e sistema di rioolering. Ora cu tin vet den sistema, no solamente e ta stroba e planta pero e motornan por haya problema serio y ta resulta den awa sushi riba caminda, pero tambe ta causa molester di holor. Ta haci un apelacion na tur hotel y restaurant pa evita di basha azeta den nan sistema di rioolering. Manera comunica den pasado door di DOW ta importante pa tur cu ta riba rioolering hasi uso di un sistema di fat-trap, cu mantencion adecua, pa asina evita cu vet ta drenta e sistema di riolering.
Tambe AWSS a duna informacion tocante di e ultimo incidentenan cu a causa obstaculo di e fluho di awa di riool den area di hotel. A informa cu a haci entrega di keho na Polis pa actonan di sabotahe cu a tuma lugar y actualmente e caso ta bou di investigacion. A bai haci limpiesa den marduga y a bin encontra baranca, biga 2×4 y cantidad di bleki placha.
