Partido Democracia Real a entrega dialuna, un concepto di amienda pa introduci un tarifa special di impuesto, pa autonan clasico.
Andin Bikker a trece esaki dilanti den rueda di prensa diamars. El a bisa cu manera nos tur sa, den dianan nacional manera Himno y Bandera, Dia di Betico, etc., por wak cu hopi hende cu tin pasion pa autonan clasico cu sa di tene nan bon teni, y clubnan cu centernares di miembronan ta tene parada, etc., y na otro paisnan incluyendo Hulanda, tin varios aña caba cu riba e numbernan di auto aki, nan ta haya un tarifa special, pasobra nan no ta autonan cu bo ta usa tur dia.
Ta dianan di fiesta, dianan special, den weekend kisas e autonan aki ta wordo usa anto e ora ey nan no tin un impacto asina grandi riba infrastructura di loke ta trata careteranan y pesey nan ta duna nan un trato special pa cu tarifa di belasting. PDR a bin cu esaki varios aña caba y hasta tabata tine den su programa di partido 2013 y segun’e 2009 tambe.
Sinembargo no tabata tin e tempo ey disponibilidad di e minister di finansas pero siman pasa den un reunion cu minister di finansas el a bisa cu ta habri pa esaki anto PDR ta bay presenta un amienda cu e tin traha caba pa cu e cambionan pa number di auto y registracion di motocicleta. Pues ta un ley cu lo wordo trata den parlamento proximamente, y dialuna PDR a entrega su concepto di amienda, y kisas lo mester haci un paar di ahustacion chikito den dje y e ta spera cu pronto lo trata esaki. Den e mesun rosea el a recorda cu algun tempo pasa e kier a bin cu un amienda pa subsidio pa clubnan deportivo, clubnan caritativo, clubnan cu ta haci servicio social pa nos comunidad manera Lions, Kiwanis, etc., pa medio di un logo riba number di auto.
Un paar di aña pasa PDR a bay cu miembronan di Parlamento, entre otro na Merca, nan a bishita DNV cu ta e departamento encarga cu licencia y numbernan di auto, y nan tin un programa na diferente estado caminda cu bo por pone e logo di bo team di futbol, of otro deporte manera baseball, etc., riba bo number di auto, bo ta paga un tarifa adicional, loke ta facultativo, kiermen bo ta dicidi si haci esaki si of no, pero parti di e placa aki ta bay e ora den e fondo pa por sostene e clubnan deportivo. Dus, esnan cu ta haci un contribucion via number di auto, nan club deportivo ta bay haya un subsidio di tur e recaudamento di fondonan pa medio di esaki. Esey ta otro amienda cu PDR ta bay presenta y cu for di dos aña caba nan a anuncie, pero no a haya oportunidad pa presente te awor cu ta bin un cambio den e ley di belasting.