Diabierna atardi, na Santa Rosa, den presencia di entre otro Parlamentarionan Ricardo Croes, Dellanira Maduro, Alan Howell, y ministernan Chris Romero cu Andin Bikker, a bini hunto pa locual ta trata entrego oficial di permiso pa spearfishing pa piscadornan di Aruba.
Awor na un manera responsabel por sigui cu un tradicion cu tin hopi aña bezig cu ne pa oficialisa na e manera aki. Minister Romero a splica cu na 2001, gobierno e tempo ey a firma un landsbesluit caminda cu tabata prohibi tiramento di pisca. Eynan bo ta wak caba cu for di 2001 te cu awor, mas cu 19 aña tin un lucha pa esaki.
Na 2017, ora cu minister Romero y minister Bikker a asumi cierto responsabilidadnan, a cuminsa bringa pa esaki di biaha y forma diferente comision na 2018 pa purba yega na un of otro manera con por introduci atrobe piscamento cu harpun. Diferente proposicion a wordo treci dilanti, tin cu a wordo nenga, e no tabata un trayecto facil segun minister Romero.
“Ta asina cu nos mester cumpli cu diferente tratado internacional, cu no ta zomaar nos por pone un banda pasobra nos tin custumbernan, nos tin leynan cu nos mester keda respeta y asina ey por ta sigur cu esaki lo por ta algo duradero. Nos a logra”, segun e mandatario a expresa. E mandatario ta sigui bisa cu esaki ta un oportunidad cu tur piscado ta haya aworaki y mester ta responsabel. “E oportunidadnan aki ta pone cu decisionnan den futuro por keda den nos fabor”, segun minister Romero.