Awor por pidi Carta di Buena Conducta online

Desde dialuna ultimo bo persona por aplica online pa bo Carta di Buena Conducta (Vog) via website di Ministerio Publico, www.omaruba.com.

Di tempo cu Covid-19 a cuminza no tabata posible mas pa pasa personalmente na Ministerio Publico pa pidi un Carta di Buena Conducta. Tur cos mester a bay temporalmente via e-mail.

Pero mientrastanto e formulario di solicitud nobo pa e Carta di Buena Conducta a wordo poni riba e website. Ta hopi facil pa e ciudadano mes yena su formulario. Ora bo persona subi e website, bo ta weita na bo man drechi e conopi oraño VOG AANVRAGEN. Bo ta primi e conopi oraño aki y habri e formulario. Una vez bo persona ta cla cu yena e formulario, bo lo ricibi un number riba bo e-mail como prueba cu a haci e peticion pa e Carta di Buena Conducta.

Dentro di dos siman bo persona lo haya (via mail) un fecha y un orario pa afspraak pa bin busca e Carta di Buena Conducta na Ministerio Publico.

Pues no ta posible mas pa pidi un Carta di Buena Conducta via e-mail. E posibilidad aki a wordo kita tambe riba e website y bo persona lo wordo hiba automaticamente pa e formulario online di Carta di Buena Conducta.

 

Comments

comments