Desde aña 1994 ta celebra “World Teachers’ Day” riba dia 5 di october. E fecha aki ta brinda e oportunidad pa promove e profesion Maestro di Scol y pone atencion na e rol esencial di e Maestro di Scol pa provee enseñansa di calidad riba tur nivel, segun UNESCO y Education International.
E aña aki ta conmemora e di 50 aniversario di e firmamento di e “UNESCO/ILO Recommendation Concerning the Status of Teachers” (1966) y e prome aña di e “Global Education 2030 Agenda” (2015).
E tema pa World Teachers’ Day di e aña aki, “Valuing Teachers, Improving their Status”, ta incorpora e principionan fundamental di e “UNESCO/ILO Recommendation” y e necesidad pa sostene e Maestro di Scol manera refleha den e “Sustainable Development Goals”. Un di e metanan ta specificamente un compromiso pa sigura educacion di calidad, inclusivo y husto y pa promove e oportunidad pa siña pa bida largo pa un y tur (lifelong learning). Pa logra e metanan aki ta considera e rol di e Maestro di Scol como uno cardinal, y pa e motibo mester balora, motiva y sostene e Maestro di Scol.
“It is necessary to motivate them by valuing their work”
UNESCO, ILO, UNICEF y otro organisacionnan cu ta sostene World Teachers Day, ta dedica e dia aki na celebracion y reafirmacion di un compromiso pa duna balor na e profesion di e Maestro di Scol.
Na Aruba, al rededor di 1400 Maestro y Docente ta dedica nan mes na enseñansa y educacion di nos yiunan. Un trabou importante y bunita, pero tambe di hopi responsabilidad y cu hopi reto.
E Maestro di Scol awendia tin un rol hopi mas amplio cu solamente para dilanti klas y traspasa conocemento. E mester duna guia, ta un bon ehempel, motiva y inspira e alumno mientras cu e sa traha cu recurso minimo y mester competi cu tecnologia moderno.
Awe, na ocasion di World Teachers’ Day, Departamento di Enseñansa Aruba (DEA) ta uni su mes organisacionnan rond mundo cu ta celebra, felicita y gradici e Maestronan di Scol pa nan balioso trabou.