Awe ta conmemora 102 aña di natalicio di Rufo Wever, musico y compositor Arubano

Rufo Wever a nace na Oranjestad, Aruba, dia 8 di December 1917. Na edad di seis aña el a cuminsa haya les di piano. Poco tempo despues el a manifesta su talento musical excepcional. Dia Rufo tabatin mas o menos 15 aña di edad el a forma, hunto cu algun di su amigonan, e orkesta ‘Melody Boys’, cu a bira un gran sensacion riba su isla natal. Resumiendo por bisa cu Rufo a dedica henter su bida, esaki kiermen mas di cincuenta aña, na e arte di musica. Hopi ta e instrumentonan cu Rufo a siña toca bon. Entre otro guitara, saxofon y clarinet, pero riba tur ta destaca Rufo su instrumento preferi: piano. Casi innumerabel ta melodianan di diferente ritmo cu el a compone desde cu el a cumpli 18 aña. Su prome composicion ta e wals ‘Arubanita’, cu ta e unico piesa cu su Mahestad Reina Juliana a baila durante su bishita na e islanan di Antiya Hulandes na 1959. Semper Rufo a considera e evento aki como un honor hopi grandi. Rufo ta co-compositor di e himno ARUBA DUSHI TERA. Na edad di 24 aña Rufo a sufri un accidente automobilistico lamentabel, den cual el a perde su man robes. Logicamente el a pensa cu nunca mas lo el a bolbe toca piano. Pero, inspira pa su gran amor pa musica, e mes a diseña algun tempo despues, un brasa artificial, cu cua el a logra vence su handicap di un manera asombroso. Cu su brasa nobo e tabata toca e notanan principal di baho riba e piano, asistiendo su man drechi di un manera sorprendentemente bon. Rufo a haci su reaparicion como pianista y a toca na television na Aruba, Corsow, Venezuela (Maracaibo), Costa Rica y Puerto Rico. El a graba varios L.P., disco 45 y 78 r.p.m., cu semper su amigonan y admiradonan a ricibi cu hopi entusiasmo.
Na 1975 Rufo a ricibi di Reina Juliana, soberana di Reino Hulandes, e condecoracion di ‘Ridder in De Orde van Oranje Nassau’. Esaki tabata e distincion oficial mas halto entre e hopi homenahe cu Rufo a yega di ricibi como reconocimento pa su contribucion na e herencia musical Arubano. (E nota aki ta danki na Sr. Johnny Croes y tambe e potretnan).

Comments

comments