Diasabra anochi lo ta e culminacion di e tres dianan di pre-final di Caiso & Soca Monarch 2017. Aruba por a gosa di mas di 100 cantica y 21 banda, compitiendo pa asina logra un lugar pa e anochi final. SMAC ta contento cu por a mira un publico anima cada anochi disfrutando di e presentacionan.
Ariba Diasabra, 4 di Februari lo tuma lugar e Grand Finals di Caiso & Soca Monarch 2017. Esaki lo ta na Carnival Village, San Nicolas. Diahuebs ultimo, e ultimo anochi di pre-final, a tuma luga e conteo di huradonan, resultando asina den e 10 Caiso y 25 Soca cu a clasifica.
Di parti di Presidente Shannon Henriquez di SMAC y Directiva completo ta manda palabranan di exito na Stichting Musica cu ta encarga cu e organisacion grandioso aki. Y sin lubida, ta manda palabranan di pabien na tur banda y cantantenan cu a clasifica, y hopi exito pa cu nan presentacion final riba diasabra.
SMAC ta invita amantenan di musica caiso y soca, y pueblo en general pa asisti masalmente riba diasabra, pa asina forma parti di e evento musical mas grandi di nos isla. Carnival Village lo ta “the place to be”, ambiente musical no lo haci falta y tin un variacion amplio di cushina y bar bon surti pa tur presente.
Entrada pa e Grand Finals di Caiso & Soca Monarch 2017 lo ta Afl. 25,- obtenibel na varios puntonan di benta. Ta conseha pa busca carchi tempran pa asina evita cu mester para den rij.