E conocido lider di e team durisimo di domino Team Snor, esta Nelson “Snor” Perez, ta bay celebra su hacimento di aña en grandi diasabra awor 17 di augustus n’e palacio di pega piedra completamente renoba, esta Domino Square Garden aya net n’e grens di Calabas cu Kudawecha! Si shonnan, en conexion cu su cumpleaños, e flamante Nelson “Snor” Perez a organisa un mini torneo entre e tres ekiponan cu e ta afilia na dje: Team Snor, di cua e ta e lider, y PLuma Gang y Pariba Legends, di cual e ta “consultant”.
Diasabra awor, 17 di augustus, cuminsando pa 8:00 di anochi, lo tuma e gran final entre Team Snor y e legendarionan di pariba di brug, Pariba Legends! Domino Square Garden a caba di renoba, fura tur stoel, te hasta fura e potnan den baño, pa ricibi un y tur den e grandioso bataya aki! Ainda, Team Snor tin un “appeltje te schillen” cu Pariba Legends, cual ultimo a gana Team Snor aña pasa nip-nip, cabey-cabey, cu score di 21-20! Un berdadero sambombaso di wega!
E aña aki, Snor kiermen cu ta otro gay lo canta den e palacio di domino. Manera semper, entrada ta completamente gratis pa pueblo amante di “cutting edge” domino en general, y durante halftime e snacknan lo lora totalmente por nada. Bini un bini tur, bin celebra B-Day di Snor Perez kende a declara cu e anochi e lo pone “vuurwater” core bin abou cu forsa manera riu ta baha bin foi sero despues di yobida di horcan Ivan! Aki un ta wega, shonnan, aki ta bay t’un anochi di come huña! Yega un yega tur, diasabra awor 17 di augustus cuminsando pa 8’or di anochi, e clasico den domino entre Team Snor y Pariba Legends! Yegaaa!
