Dialuna merdia durante un conferencia di prensa, CENSO den presencia di prome minister Evelyn Wever-Croes, y minister di Husticia, Andin Bikker, a duna presentacion di lansamento oficial di rijbewijs nobo pa Aruba.
Pues awe a introduci un Rijbewijs nobo pa Aruba, tempo ta desaroya, instrumentonan di seguridad ta desaroya, y tambe den cuadro di esfuersonan di Gabinete Wever Croes, esaki ta pa brinda un miho servicio pa publico segun minister Bikker.
“Esaki tabata un di e prioridadnan cu nos a pone como meta, y el a tuma hopi trabao pero nos a logra, y nos a logra modernisa leynan y maneho aplicabel cu aworaki pronto nos lo tin un version digital di e rijbewijs akinan,” segun minister Bikker.
Esaki ta un documento pa ta hopi orguyoso di dje segun e mandatario, unda cu den diferente dimension y aspecto ta ilustra diferente parti di nos cultura; tin e aspecto di biento cu a wordo incorpora den dje y mas aspectonan inovativo di siguridad.
Ta asina cu a wordo traha un sistema central, desde 2014 pa awor no tabata tin un caminda pa registra e examennan, awor si esaki ta e caso. E examen ta wordo registra door di e polis cu ta pasa e examen, mester tin semper dos den e proceso aki. Ora esaki wordo hinca den e sistema – caminda cierto documentonan tambe ta wordo scanned pa forma parti di e documento/file – esaki ta bay den un database, e ora e persona ta haci su cita riba censo.aw anto e por bin saca su rijbewijs, esaki ta conta pa esnan cu ta bay saca rijbewijs aworaki.
Tin un retraso di 500 rijbewijs cu tambe ta bay wordo hinca den e database aki pa Cuerpo Policial, pero di renobacion di rijbewijs mes cu a caduca tin un retraso di ongeveer 4000. E 500 nan aki ta e retraso di hende cu a pasa nan examen pero no a haya nunca un carchi di rijbewijs.
Pa esnan cu tin rijbewijs caba, esaki a wordo haci door di saca e database di rijbewijs di 2014 pa 2020, a integra esaki den e sistema nobo.
E rijbewijs nobo lo subi di calidad fisico cu su aspectonan nobo di siguridad, pero tambe e producto mes lo bira mas confiabel segun CENSO.