KINSHASA.- Al menos 14 minero a muri den un mina na Kalehe, den e parti oost di Republica Democratico di Congo (RDC). Esaki ta door di un deslisamento di tera provoca door di e fuerte awasero, segun fuentenan di sociedad civil.
“Cerca di 40 minero ainda ta dera bou di e lodo. Nos a recupera 14 curpa y otro 11 persona ta herida. Awo nos ta purbando di organisa e yudansa”, e activista di sociedad civil den e zona Emmanuel Elameji, a bisa via telefon na EFE.
E incidente a tuma luga diaranson durante e excavacion di e mina di Kalimbi Nyabibwe, den e provincia oriental di Kivu del Sur, un zona cu tambe a wordo afecta pa e accionnan di e grupo insurgente Hutu Forsanan Democratico pa Liberacion di Ruwanda (FDLR).
Segun e activista aki, cu a denuncia cu e no ta ricibiendo apoyo den e accionnan pa parti di gobierno ni di e Mision di Nacionnan Uni na RDC (MONUSCO), awaseronan fuerte tabata causante di e derumbe di tunelnan artesanal cu e mineronan a coba.
Na october 2018, curpanan di al menos 25 minero a wordo haya den estado di descomposicion den un mina na Misisi, ubica tambe den Kivu Sur, como consecuencia di un derumbe provoca tambe pa awaseronan torencial.
E incidentenan aki ta comun den e nacion Africano aki, rico den recursonan mineral, hopi di nan den minanan informal cu casi nada di regulacion y opera pa varios milicia, unda cu operacionnan di rescate hopi biaha ta un tortura.