E awasero fuerte cu a registra diaranson den e estado di Mexico,a causa inundacion den e municipionan di Chimalhuacan, Los Reyes La Paz, Texcocom Ecatepec, Chicoloapan, San Mateo Atenco, Metepec y Nezahualcoyotl.
Un di e municipionan mas afecta ta Chimalhuacan, unda cu varios caya, entre nan e cercania n’e palacio municipal, a keda inunda, di acuerdo cu e medionan local.
Tambe a reporta cu den e fraccionamento San Lorenzo, e nivel di awa a supera e meter di halturam logrando drenta algun cas. Fuera di esey, un van a keda tranca den e coriente di awa.
Presidente municipal Xochitl Flores Jimenez, a anuncia e ponemento den marcha di un plan di emergencia pa atende e poblacion afecta p’e inundacionnan. E Organismo Descentralizado de Agua Potable Alcantarillado y Saneamiento di Chimalhuacan a informa cu nan ta trahando pa libera e sistema di riolering cu e fin p’e awa core di manera optimo. Tambe el a pidi e habitantenan pa no tira sushi riba caya pa no stroba e riolering.
Di su parti, e presidente municipal di Nezahualcoyotl, Adolfo Cerqueda Rebollo, a menciona cu e awasero tambe a causa problema den su municipio, agregando cu ta trahando cu e Secretaria di Awa di e estado di Mexico y e Comision Nacional di Awa di Mexico pa atende e situacion.
E habitantenan di e colonia Jardines de Morelos Seccion Bosques, den e municipio di Ecatepec, a declara n’e medionan local cu e fayo di e red di riolering a provoca cu e awa a drenta den por lo menos 80 cas y mas di dies negoshi. Sinembargo e director di Proteccion Civil di e ciudad, Jesus Miranda, a sigura cu ta cuater caya cu ta bao awa y cu e awa a penetera den e patio di e casnan.
Mientrastanto e secretaria di awa di e estado di Mexico a notifica cu e awasero den e municipio di Metepec y San Mateo Atenco a causa e desborde di dos canal.
Di su parti, autoridad di e estado di Mexico a informa cu liña 3 du e servicio di transporte di Mexibus a wordo suspendi, pa cual a pidi e usuarionan pa busca otro medio pa yega nan destino. Tambe e Circuito Exterior Mexiquense a keda afecta p’e aumento di e nivel di awa, loke a provoca problema riba caminda.