Boca Prins Restaurant tabata hopi den publicidad den e dianan aki, mirando cu nan tabata haci uzo di awa di dam, pa asina cushina. Esaki sigur ta algo no higienico, pa cual Departametno di Salud Publico a laga cera e restaurant en cuestion.
Sra. Nathaly Maduro, director a di Santa Rosa a splica cu haciendo uzo di awa di dam, esaki ta trece cierto peliger pa nos comunidad. Nan tin un relacion bastante estrecho cu DVG, cu ta entidad cu ta controla e damnan principal di nos isla, pero Sra. Maduro a enfatisa cu e awa di dam ta wordo uza solamente pa agricultura y cria di bestia.
No ta consehabel pa haci uzo di awa di dam. Aruba tin un WEB cu ta duna awa di bon calidad, filtra caba, cla pa uza. Preferiblemente haci uzo consciente di esaki. Si kier baha gasto, Santa Rosa ta recomenda pa purba di catch mas awa di yobida cu ta posibel. Si wak bon, e mayoria di e damnan tin basta awa aden ainda, y tur ta awa di yobida. Na cas tambe por pone bakinan pa carga awa. Pero tene cuenta si cu e parti di sangura. Pa locual ta e awa di dam, ta pidi cooperacion pa no haci mal uzo di esaki.
Santa Rosa ta depende hopi di e awa aki y nos cunukeronan tambe. Tin un demanda hopi mas grandi ariba productonan local, pero mester di awa pa produci esaki. Ta spera cu nos hendenan bira mas consciente, segun Sra. Maduro a bisa. Trucknan septico tambe ta bay coy awa di dam, pa entrega pa agricultura. Esaki tin su risiconan cun’e, y nan ta halto. P’esey Santa Rosa tin un werkgroep chikito hunto cu DVG, unda cu lo bay traha ariba maneho pero tambe un campaña di conscientisacion mirando cu hopi hende no ta wak e peliger di cu cada biaha cu nan bay, pa uza e trucknan septico na e damnan.
Por distingui e trucknan di Santa Rosa for di tur otro truck ya cu e trucknan di Santa Rosa tin un sticker ariba nan. Asina cu wak e truck cu tin sticker, e comunidad sa cu e awa den e truck ey ta destina pa agricultura. Tur otro truck cu lo por ta para na e damnan, semper por tuma e number di e truck y geef esaki door na e departamento di DOW of na departamento di Salubridad.
Pa loke ta e damnan, ora cu cera un dam, e gasto cu esaki ta trece cun’e, ta halto. Por corda cu a laga cera un dam cual ta e dam na Hooiberg, pero esaki tabata en cooperacion cu polis. Pero lamentablemente ora di bay bek, antisocialnan a kibra cadena, a kita baricada. Loke Santa Rosa ta bezig cun’e aworaki ta pa wak cual lo ta e dam piloto pa pone full e infrastructura pa crea un modelo cu por wordo uza pa e otro damnan.
Por ultimo, Sra. Nathaly Maduro a splica cu door cu e damnan ta habri, ta haya no solamente e trucknan septico, pero tambe hendenan cu ta bay tira sushi na dam. Den e tempo di secura cu Santa Rosa a probecha haci e damnan limpi, a haya articulonan cu por saca kimico den e awa. Y mester compronde cu e awa ta algo importante pa locual ta awa di dam. Pero no ta p’esey mester maluz’e tampoco. Y pa e salud tambe e no ta awa pa uzo humano.