Awa color di petroleo ta sali for di cranchi

CARACAS, Venezuela- Despues di varios dia sin servicio di awa potabel den estado Carabobo, esaki a cuminsa yega den e hogarnan, pero contamina y no apto pa consumo humano. Esaki te denuncia di habitantenan di e municipio di San Diego cu diferente testimonio cu a keda publica ariba Twitter.

Ademas di e crisis social y politico cu e pais ta pasando aden, Venezuela ta pasando den un blackout masivo di mas di 100 ora, cu a afecta e servicionan basico, incluyendo e suministro di awa.
“E situacion pa falta di awa na San Diego ta horibel. Tin sectornan cu tin mas di 2 luna sin e servicio, igual cu otro zonanan di Valencia y Los Guayos”, e periodista local Heberlizeth Gonzales a scirbi ariba su rednan social.

E periodista Venezolano Daniel Rios, a comparti otro video dia 13 di maart. “Awa ta yega pero preto y ta hole malo, despues di mas di un luna sin e servicio publico aki cu ta vital”.

Durante e blackout cu ya caba a drenta su di 6 dia, mas di 20 persona a muri den hospitalnan pa falta di atencion. E condicionnan pesimo di salud tambe ta representa un risico pa e poblacion.

Reporteronan grafico a registra imagennan conmovedor di hendenan buscando desesperadamente awa pa bebe den un di e riunan mas contamina di Venezuela.
E riu Guaire, di Caracas, tabata escenario di algun di e imagennan mas doloroso di e crisis Venezolano cu a laga e poblacion sin e mas minimo pa e existencia: awa..

Comments

comments