Mirando e desaroyo decepcionante di e crecemento economico durante di e ultimo 7 añanan, un biaha mas nos ta haya e parlamentario di AVP, Rene Herde – den su desesperacion pa defende su gobierno ciegamente – ta sali padilanti y ta bolbe manipula mente di pueblo cu cifranan fantasma di crecemento economico. Tur esaki despues cu MEP ya na varios ocasion caba ta pidi un splicacion for di Gabinete Eman na kico nan a malgasta e 3 biyon florin extra cu nan a haya na entrada y aumento di debenan durante e ultimo 7 añanan. Y pa hustifica nan maldad den gobernacion, cada biaha sr. Herde ta papia di e caida di nos economia cu -11.3% na 2009 bao di Gabinete Oduber, segun partido MEP.
Crisis financiero mundial
Pero tur hende cu sano huicio ya ta na altura caba di e crisis financiero mundial na 2008/2009 cu tambe a afecta pais Aruba severamente y cu a conduci na e caida drastico menciona. Sinembargo sr. Herde no ta papia nada di e hecho con den e añanan anterior nos economia a crece grandemente bao di Gabinete Oduber y cu te hasta na 2004 nos pais a conoce un crecemento economico record di 7.9%. Hecho ta cu tanto na 2003 (2%), 2004 (7.9%), 2005 (1.2%), 2006 (1.1%), 2007 (2%) y 2008 (0.2%) nos economia a crece positivamente.
Downgrading door di AVP
E crecementonan aki siguramente a conduci cu tanto Fitch, Standard & Poor’s, IMF y Gobierno Hulandes a duna elogio na Gabinete Oduber, caminda nos pais tabata tin un Credit Rating di A- y asina mes cu nos pais a ser afecta seriamente door di e crisis financiero mundial.Y tur e logronan aki di crecemento a ser realisa sin cu Gabinete Oduber a hereda cientos di miyones di florin manera cu e gobierno di AVP si a haya na final di 2009, esta di 970 miyon florin. Alavez Gabinete Oduber no a fia biyones di florin endeudando e generacion aki y futuro generacionnan, manera cu Gabinete Eman a haci cu e aumento di e megadebe cu 2.2 biyon florin. No mester lubida tambe cu ta bao di Gabinete Eman nos pais a ser downgraded te na un Credit Rating di BBB-, un paso mas pa yega na un Junk Rating. Esaki no ta un berguensa, sr. Herde?
Scondemento di e berdad
Pero un biaha mas no por falta e manipulacion cu cifra di parti di Rene Herde. Den su ultimo comunicado el a trece padilanti cu “entre 2010 y 2017 economia a crece cu mas di 13%”. Sinenbargo den e tabel adhunto por mira con e crecemento economico tabata entre 2010 y 2016 bao di Gabinete Eman. Un y tur por constata cu desde 2004 pais Aruba a conoce caidanan drastico di nos economia y den total entre e 7 añanan di Gabinete Eman e economia a crece cu solamente 3% !!. Awor ta di unda Rene Herde a inventa e 13% aki of esaki ta forma parti di e scondemento di berdad pa loke ta e situacion financiero economico cu su gobierno di AVP lo laga atras na september 2017?