Trahamento di lista tin su retonan y den caso di partido AVP esaki no tabata diferente segun lider di e partido, Mike Eman a declara despues di a entrega e lista di candidatonan cu cual AVP lo participa den eleccion di dia 25 di Juni proximo.
“E lista di AVP tambe tabatin su retonan caminda e logro mas grandi tabata cu AVP a logra di atrae un cantidad hopi grandi di profesionalnan, economistanan, educadonan, hendenan cu conocemento di relacionnan den Reino, profesornan, personanan cu capacidad riba tereno di finansa, tereno social y loke sigur tambe ta hopi importante, tereno di labor y tereno di comercio.
Pues un lista balansa, cu profesionalnan kendenan por bay atende cu rescate di pais Aruba, p’esey nos a yama e lista aki e team di rescate, e partido cu tin e tarea grandi pa tur e situacion complica cu Aruba ta bibando na e momentonan aki di pobresa, miseria, perdida di poder di compra, hopi insiguridad y incertidumbre.”
A mira hopi depresion den e pais aki, Aruba ta anhela un perspectiva nobo, Aruba kier mira portanan cuminsa habri atrobe pa un desaroyo sano den e pais aki.
Aruba a sufri ultimo cuater añanan na hopi medida, na falta di interes pa esunnan di menos recurso den e pais, falta di vision pa por a prospera economia di e pais, un gobierno di conflicto continuo cu tur gremio na Aruba.
No tabatin preparacion, no tabatin un economia creciente cu tabata den recesion y esey ta haci cu e team di rescate cu AVP a forma di tur e profesionalnan cu nos tin riba lista, caminda si mira riba e lista caminda por mira e experencia cu tin, candidatonan cu tabata minister, kendenan sa kico ta goberna, parlamentarionan cu experiencia, kendenan a dirigi hopi comision di Parlamento pero na mes momento por mira tambe hopi cara nobo.
Por mira caranan cu a crece den politica manera Gerlien Croes kende a crece grandemente cu bon aceptacion den pueblo, canando cu e lider pa entrega lista, cu mensahe pa hobennan cu si pone mente y curason na algo, traha cu dedicacion, ta cuminsa un caminda y lo crece y crece, manera Gerlien awe candidato number cuater riba lista di AVP.
Por mira un profesor Ryçond Santos do Nascimento, un persona cu ta conoci den Reino como un di e miho specialistanan den e relacion den Reino na e momentonan aki, caminda antes tabatin Mito Croes y awe tin Ryçond Santos do Nascimento.
Tin tambe e personahe importante riba tereno di salubridad cu AVP a atrae den persona di Selene Kock, un profesor den medicina kende a biba COVID, kende a mira pashentnan sufri pa falta di vacuna, falta di informacion na tempo, caminda nan por a keda sin drenta hospital si no tabata pa falta di un maneho hopi mas coherente riba e tereno di COVID.