Diamars ultimo parlamento di Aruba a debate riba e futuro di minister Paul Croes. E tabata un debate hopi fuerte caminda fraccion di AVP, prome minister Mike Eman y minister di husticia Arthur Dowers a bin cu tur e intencion pa desvia for di e topico. Nan kier a discuti tur otro cos menos e gravedad di e asunto di minister Paul Croes. Fraccion di MEP a bisa adelanta cu un minister manera Paul Croes NO por keda mantene su funcion mirando e hecho cu a gara un trahado ilegal na su cas y asina aki e minister a viola nos leynan y e mes no a tene su mes na reglanan. Nos a bisa cu nos lo bai entrega un mocion di desconfianza contra Paul Croes pa asina por baha e minister for di su funcion.
Partido AVP a presenta un lista di criteria ki ora bo ta entrega un mocion di desconfiansa contra un minister pasobra segun nan, no ta zomaar bo ta entrega un mocion di desconfianza pa baha un minister. Segun e criterianan di AVP bo ta entrega un mocion di desconfianza contra un minister ora: ‘’ cu e minister tuma decisionan robez of contra ley, of comporta contra moral y etica’’. Paul Croes a tuma decisionan robez dunando ‘’ontheffing’’ na funcionnan cu na Aruba mes tin hende pa nan. Por ehempel e la duna ontheffing na masha hopi security guardnan siendo cu na departamento di labor mester tin masha hopi hende inscribi pa busca un trabou di security guard. Paul Croes a duna casi 2000 ontheffing y asina kita pan di 2000 hende cu ta biba riba e pais aki. Paul Croes a actua contra ley na momento cu a gara un trahado ilegal na su cas. Kiermen ora nos repasa e criterianan cu AVP mes a bin cune, Paul Croes ta cumpli cu tur e criterianan aki.
Lamentablemente fraccion di AVP NO ta tene su mes na loke nan mes ta bisa pasobra enbez cu nan a para pa bon gobernacion, pa integridad y pa nos constitucion nan a para bai defende maldad.
Segun AVP ora un trahado ilegal wordo gara na bo cas ta traha esaki no ta contra ley y esaki no ta contra reglanan di bon gobernacion. Segun AVP ora bo duna ontheffing pa un security guard drenta mercado laboral esaki no ta un decision robez. Segun AVP mas sospechoso bo ta den un caso mas beneficio di duda nan ta dunabo. Ta un lastima loke a sosode den parlamento di Aruba caminda un promer minister mes NO ta tene su mes na reglanan di bon gobernacion, ta trapa riba nos constitucion y no ta para pa integridad di ministernan.
Loke a sosode diamars ultimo den sala di parlamento ta crea un presidentschepping cu den futuro NINGUN minister cu ta bao investgacion NUNCA por wordo baha. Si resulta mayan cu Paul Croes a haci su mes culpabel di loke e ta wordo acusa anto e ora ningun miembro di partido AVP lo por forma parti di cualkier parlamento pasobra nan tur a faya y no merece di ta den sala di parlamento pa controla gobierno. Esaki tawata e momento pa actua y manda un senjal pa communidad cu tur politico den parlamento ta para pa integridad di gobernacion!
AVP a demostra cu nan NO ta para pa INTEGRIDAD, nan NO ta para pa BON GOBERNACION y nan ta TRAPA NOS CONSTITUCION!