Dialuna mainta, un avion 757-200 di e compania aereo United Airlines a perde un taira durante lantamento n’e aeropuerto internacional di Los Angeles, segun e aerolinea a confirma na USA Today. E incidente inkietante aki t’e di dos di e tipo aki cu a sosode cu un avion di e mesun compania pa loke t’e aña.
Vuelo 1001, cu tabata bayendo Denver, Colorado cu 174 pasahero y 7 tripulante, a baha di manera sigur n’e aeropuerto destina despues di a bula alrededor di tres ora. “E taira a wordo recupera na Los Angeles y nos ta investigando kico a causa e incidente aki,” vocero di e aerolinea a comunica. No a informa di herido debi n’e suceso.
Na maart ultimo, un Boeing 777 di e mesun compania a perde un taira mientras cu e tabata lantando vuelo di e aeropuerto internacional di San Francisco, California. E wiel a cay riba e parkeerplaats di e aeropuerto, dañando varios auto. Mas despues, for di e compania a informa cu e vuelo, cu destino n’e ciudad Hapones di Osaka y cu 249 persona abordo, a baha sin problema n’e aeropuerto di Los Angeles.
Diadomingo a informa cu Boeing a acorda declara su mes culpabel den e caso di e Departamento di Husticia di Merca, relaciona n’e dos accidentenan fatal di nan avionnan di modelo 737 Max na 2018 y 2019, caminda cu 346 persona a fayece. E gigante aeronautico lo declara culpabel di un cargo di conspiracion di fraude criminal y lo paga un multa di 243,6 miyon dollar.
