DURANGO, Mexico- Diamars un avion comercial di Aeromexico a cay un rato despues di a lanta vuelo for di e Aeropuerto Internacional Guadalupe Victoria, di Durango.
A bordo di avion, un Embraer ERJ-190AR di Aeromexico Connect, cu tabata opera e vuelo AM2431 cu destino Ciudad de Mexico, tabata tin 99 pasahero y 4 tripulante. Tabata tin varios menor di edad entre e pasaheronan. Gobernador di Durango, Jose Rosas Aispuro, den un conferencia di prensa a bisa cu e accidente no a laga victimanan mortal.
El a indica tambe cu casi tur e ocupantenan a ricibi atencion medico y solamente 49 mester a wordo hospitalisa. Despues di algun hora mayoria di nan por a bay caso. Esun cu ta den estado grave ta e piloto, pero su condicion ta stabiel. Motibo di cu e piloto ta asina grave, ta door cu el a ricibi e impacto di frenta.
Causa di accidente
Autoridadnan ta investigando e causanan di e accidente di e vuelo AM2431, pero ta pensa cu esaki lo por ta door di e condicionnan climatico den e zona. “Na momento di lanta vuelo, e avion a wordo afecta pa un rafaga di biento cu a haci cu el a perde velocidad di biaha y touch tera cu su hala robes, pa cual el a perde dos motor.