Internacional: 3 avion pa pasahero, cual un di nan tawata di KLM, siman pasa Diadomingo a casi dal den otro riba India. E otro dos nan tawata di National Airlines di Merca y Eva Air di Taiwan.
E dos avion nan tawata bula riba e mes un nivel riba New Delhi ora cu e sistema di alarma a dal sende automaticamente. Dos avion a core subi di nivel pero door di haci esaki nan por a pone e avion di KLM na peliger. Avion di KLM a sali for di Amsterdam rumbo pa Bangkok.
E control di aeropuerto a sa di evita un accidente door di duna e avion di National Airlines ordo pa sigui subi di nivel y pa desvia pa banda robes. Asina tur 3 avion por a sigui nan rumbo. Media local a laga sa cu autoridad di aviacion lo bay haci investigacion pa saca afo kico a bay robes. Vocero di KLM a duna di conoci cu niun momento tawata tin peliger. E avion di KLM tawata bula na nivel basta halto pa por a wordo considera peligroso pa dal den otro avion. Nan no a registre como un accidente tampoco.