BOGOTA, Colombia – Despues di 60 aña di operacion, Avianca lo suspende desde dia 16 di Augustus proximo, su vuelonan for di y pa Venezuela. E decision tambe lo afecta e ruta Lima-Caracas-Lima. E aerolinea a informa cu e biaheronan cu reservacion pa vuelonan posterior na e fecha menciona, por solicita pa nan haya nan placa bek 100% di e balor paga.
Ademas, a indica cu e determinacion a adopta tras un reunion tecnico realisa diaranson cu autoridadnan aeronautico Venezolano, manera Inac, den e oficinanan di Aerocivil, unca cu a expresa e dificultadnan cu a bin ta presenta den e operacion aereo pa e pais bisiña.
Tras e reunion, e aerolinea a conclui cu ta rekeri adecua procesonan, mehora e infrastructura y garantisa e consistencia di e operacionnan, pa cual a tuma e decision di suspende e operacionnan na Venezuela pa tempo indefini. “Avianca lo analisa e decision aki, una bes cu e conoce e resultadonan di e trabao tecnico cu autoridadnan di ambos pais ehecuta pa resolve e impedimentonan operacional y di siguridad aki,” e empresa a señala.
E medida ya a wordo notifica na e Instituto Nacional di Aeronautica Civil di Venezuela (Inac) y Aerocivil, entidad cu a comenta cu solamente ta sirbi como facilitador di e encuentro entre e aerolinea y e entidad Venezolano y a recalca cu e suspension di e vuelonan tabata decision di Avianca.
No ta e prome biaha cu e compania aki tin problema cu Venezuela: di un banda e ta den lucha pa recupera $238 miyon atrapa den e pais bisiña (e empresa ya a saca e recursonan aki di su balans). Ademas, tey e episodio polemico cu a tuma luga na October di 2016 ora cu dos jet (Sukhoi) Venezolano a intercepta y a sigui pa algun minuut un vuelo di e aerolinea Colombiano cu tabata tin e trayecto Madrid-Bogota.
E presidente ehecutivo di Avianca, Hernan Rincon, a expresa: “Nos ta lamenta di tabata tin cu yega na e decision aki, pero nos obligacion ta pa garantisa e siguridad di e operacion. Como compania nos tin tur e disposicion y boluntad pa bula bek, una bes cu haya e condicionnan rekeri pa haci’e.”
Tin un total di 48 buelo semanal for di Colombia pa Venezuela y Avianca lo proporciona 14 di e servicionan aki. E mayoria ta sali di Bogota y solamente 5 di Medellina (por medio di Avior Airlines). Di manera cu desde dia 16 di Augusuts lo perde cerca di 30% di e trayectonan internacional aki. Y ainda no ta claro cu e reduccion den e oferta ta implica un aumento den e tarifanan. Y tin cu tene na cuenta cu e pasashinan di ida y buelta tin un prijs di rond di $1.500.000.
Ta trata di un fluho importante di pasahero, pues segun cifranan di Aerocivil entre Januari-Mei di 2017 a mobilista pa 107.813 pasahero, mientras cu na 2016 e tabata 123.582, loke ta nifica cu tin un disminucion di menos di 12,76%.
E accion di Avianca a presenta caida dentro di e mercadonan di balor: na New York e pakete di accion a perde un 1.52% y tabata ubica na $7,12 y den e bolsa di balor di Colombia el a baha 1,83% y a fluctua cerca di $2.680. Tin cu corda cu e titulo di e aerolinea ya a acumula desbalorisacion di 27%, debi na e decepcion di e inversionistanan tras e negociacion cu United cu solamente a resulta den un aliansa comercial.
E suspension di e buelonan for di y pa Venezuela a tuma luga mey mey di un dificil situacion politico den e pais bisiña. Diadomingo awo lo realisa e votacion di e Asamblea Nacional Constituyente (ANC) impulsa pa e Gobierno di Nicolas Maduro. Solamente ta keda pa wak pa cuanto tempo Avianca lo mantene su medida di no opera den e nacion aki.
Fuente: www.elespectador.com