“Avengers: Endgame” a bira e di dos pelicula cu mas hopi placa recauda rond mundo, superando ‘Titanic’, segun calculacionnan publica diadomingo pa e compania specialisa Exhibitor Relations, AFP a informa.
Cu 145,8 miyon dollar genera e fin di siman tras di lomba na Merca y un total di 2.190 miyon den dos siman na nivel mundial, e di cuater y ultimo entrega di e Aventuranan di Iron Man, Hulk, Thor y compania a supera “Star Wars – The Force Awakens (2.070 miyon) y “Titanic” (2.180 miyon).
E pelicula, e di 22 di e universo Marvel, su estreno tabata apenas 11 dia pasa y a recauda 575.8 miyon dollar na China so. Solamente “Avatar”, cu 2.790 miyon dollar genera na mundo, ta super’e.
Expertonan di Hollywood ta calcula cu futuro briyante pa “Avengers”, cu a laga 96% di e publico satisfecho, danki na su combatenan espectacular y un elenco igualmente atractivo: Robert Downey Jr, Chris Evans, Mark Ruffalo, Chris Hemsworth, Scarlett Johansson, Bradley Cooper y Josh Brolin.
E triller psicologico “The Intruder” a keda na di dos luga di e taquillanan Mericano cu 11 miyon dollar den su prome fin di siman. Michael Ealy y Meagan Good ta duna bida na un pareha hoben cu ta bay biba den e cas di nan soño na Napa Valley, California. Pero su antiguo doño (Dennis Quaid) ta dicidido na recupera e cas.
Un otro novedad, e comedia romantico di Lionsgate “Long Shot”, a keda na di tres luga, cu 10 miyon dollar. Den e historia di amor aki, entre dos personahe cu ta wordo separa pa tur cos, Seth Rogen ta interpreta un periodista desemplea encarga di scirbi discursonan di e personahe encarna pa Charlize Theron, su ex babysitter y candidata pa presidencia.
Otro estreno, e pelicula di animacion di STX Films “UglyDolls” a logra e di cuater luga, cu 8.5 miyon dollar.
“Captain Marvel” ta cay na di cinco luga, cu cu 4,2 miyon dollar weekend pasa y na nivel mundial 420,7 miyon den nuebe siman.
Siguientemente e resto di e 10 peliculanan mas exitoso:
6 – “Breakthrough”: 3,9 miyon dollar (33,2 miyon den tres siman)
7 – “La Llorona” The Curse: 3,5 miyonn (48,1 miyon den tres siman )
8 – “Shazam!”: 2,5 miyon (135,2 miyon den cinco siman)
9 – “Little”: 1,5 miyon (38,6 miyon den cuater siman)
10 – “Dumbo”: 1,4 miyon (109,7 miyon den seis siman)