AVB ta sigui aporta na clubnan FC San Nicolas ta organisa Sunrise City Cup 2020

FC San Nicolas ta organisa Sunrise City Cup 2020 p’e categorianan U-9 y U-11. E campeonato di Arubaanse Voetbal Bond (AVB) a cancela despues di e situacion di COVID-19 y no por a declara un campeon den e categorianan di Lifida.

Den e torneo aki ta conta cu un participacion di 9 club, cual ta 18 team, pasobra tin teamnan cu tin diferente categoria manera Estrella. E campeonato lo dura dos weekend, unda cu ta cuminsa diabierna 31 di Juli awo cu 4 wega, y e final lo ta dia 9 di Augustus na Joe Laveist Sport Park.

Lo parti e veld den dos unda cu den e categoria U-11, e teamnan lo hunga 8 contra 8, asina Carlis Rowe, presidente di SV San Nicolas, a bisa. Na mes momento lo hunga 2 wega y a baha e minuut di 20 na cada banda. Esaki ta un sistema cu ta uza na Inglatera y Hulanda.

E sosten cu SV San Nicolas a ricibi di AVB tabata un oportunidad unico. E federacion a acerca nan despues di a mira e progreso di FC San Nicolas. AVB a yuda nan hinca e schedule den otro, pero tambe a yuda cu e parti financiero. Pa esaki e directiva di FC San Nicolas ta hopi gradici.

Angelique Wout, Vice presidente y secretaria general di FC San Nicolas, a indica cu e tabata un reto pa por a organisa e torneo aki pa motibo di e situacion di COVID-19. Door di tur exigencia cu tin, nan a percura pa tene na cuenta cu tur precaucion necesario pa tur hende ta den un actividad sano. E tribunanan lo ta marca unda fanaticonan tin cu pasa, ta bay tin un area cu hand sanitizer.

Durante e torneo aki lo conta cu bishita special di entrenadonan di FC Everton. Nan lo duna sesion gratis di warm up p’e teamnan participante den e torneo. Tambe nan lo yuda den e parti tecnico durante e wega, y lo conta cu presencia di e Fundacion Tur cos ta Posibel cu un photobooth.

 

Comments

comments