Arubaanse Voetbal Bond a tene un ceremonia pa duna reconocimento y merito na dos persona cu cada un den un forma unico a y ta significa hopi pa e federacion di futbol local. E dos personanan ta Leon Ras y Mirna Loopstok, ambos a dedica gran parti di nan bida na e deporte rey, futbol.
Un di e personanan cu AVB a duna reconocimento ta Sr. Leon Ras, kende den añanan 70 tabata un di e keepernan mas renombra na Aruba. E merito cu AVB ta reconoce ta debi cu Ras, pa 450 minuut largo, a tene su gol limpi. Esaki ta algo cu pa hopi tempo no a sosode na Aruba. Leon Ras a dedica hopi tempo di su bida na mundo di futbol y na e mundo musical. El a dedica hopi atencion na plantacion.
“Kiermen ta un personahe conoci den comunidad y pa e motibo ey directiva di AVB a tuma e decision pa dun’e reconocimento”, asina Presidente di AVB, ing. Richard Dijkhoff a expresa. Leon Ras te cu recien tabata activo compartiendo su experiencia cu algun keeper di diferente division di e organisacion di SV Britania.
E di dos persona cu AVB a reconoce ta Mirna Loopstok, kende pa mas di 18 aña tabata un trahado ehemplar den e administracion di AVB. A dun’e un reconocimento pa su bon trabao cu e ta bin ta haci durante tur e añanan aki. Su persona semper tabata dispuesto pa yuda y e tin e conocemento di unda tur documentacion tawata den AVB y semper tawata por a duna contesta na cada pregunta cu wordo haci, Dijkhoff a expresa. Un persona cu semper ta ricibi e clientenan di AVB cu un sonrisa ariba su cara.
“Mi mes como presidente di AVB, pa tres aña largo a traha hopi di cerca cu su persona. Mi mester bisa un persona hopi corecto, puntual y hopi nauwkeurig. Nunca no tawata tin of por tawata tin un keho riba su persona. Un persona ehemplar cu a dedica oranan largo na e administratie di AVB”, asina e Presidente di e bond a remarca. E reconocimento nan aki a tuma luga den presencia di familiarnan di cada persona, dirigentenan di e clubnan miembro y invitadonan.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.