VERACRUZ, Mexico- Autoridadnan di estado Mexicano di Veracruz den fin di siman a rescata 178 inmigrante Centroamericano for di un truck di carga staciona ariba un caretera federal, segun medionan di prensa Mexicano.
Segun e diario La Jornada, un truck cu al menos 170 migrante a wordo bandona den e municipio di Tantima, noord di Veracruz.
E ilegalnan, cu tabata sufri di deshidratacion grave, a wordo transporta pa e auditorio municipal di Tantima, unda nan a ricibi atencion medico. E residentenan local a duna ayudo na e personana aki, dunandonan awa y cuminda.
“E traficantenan cu mester a traslada nan na e frontera a bandonanan na nan suerte”, segun un informe policial.
No ta prome biaha cu autoridadnan Mexicano ta haya un truck sobrecarga di inmigrantenan ilegal, cu e trafico di persona for di Centroamerica pa Mexico y di eynan pa Merca, ta un negoshi comun den e region, cu ta genera biyones di dollar anualmente.
Debi na pobresa, e desempleo cronico y un tasa di homicidio mas halto cu cualkier region di mundo, hopi centroamericano a hayanan obliga di bandona nan hogar y cumisna e tipo di aventuranan extremo aki, cu hopi biaha ta caba na morto, sea door di deshidratacion of na man di criminalnan.
Fuente: http://www.hoylosangeles.com