Elton Geerman ta sintando un castigo den KIA pa actonan di inmoralidad cometi cu un menor di edad. Awo autoridadnan mester a busca proteccion p’e pa menasanan cu tin contra dje.
Geerman a wordo cera despues cu el a bolbe for di Hulanda unda cu el a bay biba cu su pareha y nan dos yiunan. Despues di su yegada investigacion a cuminsa, te cu a hib’e dilanti mesa berde, y el a declara tur cos si.
E menor cu el a abusa di dje tabata un mucha cu e famia aki tabata wak p’e for di tempo cu e tabata baby. E ta yiu di un amistad di cas di nan. Y asina, door di cercania el a haya chens di mishi cu e menor, cu e mes a admiti tur cos.
Pero e problema cu a surgi den KIA no ta relaciona cu el a comete e delito contra un menor di edad. Sino pa e hecho cu e ta yiu di un funcionario halto di Cuerpo Policial. Specificamente, pasobra e funcionario policial aki tabata envolvi den un investigacion grandi cu a manda un homber preso. Y e homber aki ta esun cu ta cera hunto cu e pedofiel condena, yiu di un polis.
E preso a haya esaki un bon chens, aparentemente, pa pone un recompensa pa cabes di Elton como castigo pa e trabou cu e funcionario policial a haci pa mand’e KIA. Autoridadnan no kier duna ningún comentario con a haya e informacion y si esaki ta confirma, pa loke ta e recompensa pa deshaci di yiu di e polis cera den KIA.
Autoridadnan a sac’e di KIA y ta buscando un prizon alternativa (den Reino) pa mand’e.