ROTTERDAM, Hulanda- Autoridadnan Hulandes diaranson anochi a detene un chauffeur di un autovan carga cu boternan di gas cerca di un sala di concierto despues di cu polisnan a ricibi un alerta door di polis di Spaña.
Aunke mas laat a descarta cu esaki lo tabata tin relacion algun cu e atentadonan na Cataluña, alcalde di Rotterdam, Ahmed Aboutaleb, a informa cu e ciudad a cancela tur evento publico, despues di a ricibi un alerta for di miembronan di siguridad di Spaña.
“E auto a hala atencion pasobra cu e tabata keda dal buelta den e mesun zona”, Aboutaleb a informa. E van tabata tin nummerplaat Spaño y tabata auto gehuur.
E aresto a tuma luga cerca di e sala di concierto camina cu e grupo di pop rock Mericano Allah-Las.
Riba e posibel vinculo cu e incidente na e atentadonan na Spaña, e alcalde a haci un yamada pa no saca conclusionnan prematuro.
E agencia di noticia Reuters a cita un fuente hudicial cu a afirma cu e aviso tabata di parti di un investigacion di e Guardia Civil di Spaña cu ya tabata tin algun tempo ta tumando luga y cu no ta relaciona cu e atentadonan.
Di otro banda, e agencia EFE tambe a señala cu e forsanan di siguridad Spaño a descarta cu e incidente na Rotterdam ta relacion cu un complot islamista.
Fuente: http://www.bbc.com/