Dialuna un team consistiendo di diferente departamento (Polis, Bureau City Inspector, DIP y DOW) a haci control riba e strip di Palm Beach unda cu a constata cu tin hopi cosnan ilegal tumando luga. Cosnan manera nesgoshi ilegal, borchinan, terasa construi, standbeeld poni entre otro, riba tereno di gobierno. Gran mayoria di esaki a constata cu no a pidi permiso. Pa motibo di falta di control y personanan pa haci control, durante di e ultimo añanan, por a constata cu cos a bay for di man. Awroaki e controlnan ta tumando luga regularmente pa percura pa re establece ordo.
Robert Maduro cu ta di e departamento di control di DIP a splica cu e control cu a tuma luga e siman aki tabata specificamente na Palm Beach y a scoge pa alerta tur esnan cu ta den violacion cu nan mester pidi pa nan permiso y pasa paga pa esaki. Polis por actua y aplica multa, pasobra ora cu bo pone articulonan riba tereno publico e ta encera cu bo mester permiso, sea e ta borchi, vehiculo of terasa.
‘Pa locual ta e control, tin riba 45 proces verbal cu a wordo duna unda cu a constata un variedad di infraccion manera menciona anteriormente riba tereno publico. Den e area di South Beach e idea semper tabata pa e area ta uno exclusivo, y cu e cantidad di kiosko mester keda minimo. Esnan cu a haya erfpacht tin stipula aden cu no mag di tin kiosko, cual a constata varios violacion tambe,’ sr. Maduro a remarca. Banda di e incumplimento di parti di comerciantenan pa locual ta permiso y pago, e area hotelero ta uno turistico hopi druk, y e meta di DIP den e caso aki ta pa crea un bista agradabel unda cu e turista y tur otro cu ta haci uzo di e area, por cana y bishita e diferente establecimentonan den forma agradabel. Pa esaki ta posibel mester percura cu ta mantene e paseo di por lo menos 2- 2.5 meter, y unda cu ta posibel por permiti borchi y terasa.
Den e proces – verbal nan cu a wordo entrega, segun sr. Maduro ta splica, ta stipula cu tin 3 dia pa acudi na DIP pa legalisa nan negoshi y ricibi precariovergunning. DIP consecuentemente lo haci evaluacion di e peticion aki. Den caso cu no nan no por wordo legalisa, e siguiente paso ta pa remove esakinan. Esnan cu no acudi na DIP, lo ricibi un bishita di nobo pa eventualmente remove e articulonan for di e sitio. Pa trece e cantidad di proces verbal cu a wordo duna den persectiva, a tuma nota cu den solamente dos caso tabatin permiso pa opera legalmente, cual ta duna indicacion cu ta trata di violacion basta grandi cu a sosode structuralmente durante añanan den e area.